กมฺมุนาติ ทสกุสลกมฺมปถกมฺมุนา. อยํ หิ ปุพฺเพ สตฺตวิธํ กายวจีกมฺมํ สนฺธาย "ยโต โข โภ สีลวา โหตี"ติ อาห, ติวิธํ มโนกมฺมํ สนฺธาย "วตฺตสมฺปนฺโน"ติ. เตน สมนฺนาคโต หิ อาจารสมฺปนฺโน โหติ. จกฺขุมาติ ปญฺจหิ จกฺขูหิ จกฺขุมนฺตภาเวน ภควนฺตํ อาลปติ.

ขยาตีตนฺติ อูนภาวํ อตีตํ, ปริปุณฺณนฺติ อตฺโถ. เปจฺจาติ อุปคนฺตฺวา. นมสฺสนฺตีติ นโม กโรนฺติ.

จกฺขุํ โอเก สมุปฺปนฺนนฺติ อวิชฺชนฺธกาเร โลเก ตํ อนฺธการํ วิธมิตฺวา โลกสฺส ทิฏฺฐธมฺมิกาทิอตฺถทสฺสเนน จกฺขุํ หุตฺวา สมุปฺปนฺนํ.