เอวํ ตาว ทณฺฑกีอรญฺญสฺส อรญฺญภูตภาโว เวทิตพฺโพ.

กลิงฺครฏฺเฐ กิร ๒- นาฬิกีรญฺเญ รชฺชํ การยมาเน หิมวติ ปญฺจสตตาปสา อนิตฺถิคนฺธา อชินชฏาวากจีรธรา วนมูลผลภกฺขา หุตฺวา จิรํ วีตินาเมตฺวา โลณมฺพิลเสวนตฺถํ มนุสฺสปถํ โอตริตฺวา อนุปุพฺเพน กลิงฺครฏฺเฐ นาฬิกีรญฺโญ นครํ สมฺปตฺตา. เต ชฏาชินวากจีรานิ สณฺฐเปตฺวา ปพฺพชิตานุรูปํ อุปสมสิรึ ทสฺสยมานา นครํ ภิกฺขาย ปวิสึสุ. มนุสฺสา อนุปฺปนฺเน พุทฺธุปฺปาเท ตาปส- ปพฺพชิเต ทิสฺวา ปสนฺนา นิสชฺชฏฺฐานํ สํวิธาย หตฺถโต ภิกฺขาภาชนํ คเหตฺวา นิสีทาเปตฺวา ภิกฺขํ สมฺปาเทตฺวา อทํสุ. ตาปสา กตภตฺตกิจฺจา อนุโมทนํ อกํสุ. มนุสฺสา สุตฺวา ปสนฺนจิตฺตา "กุหึ ภทนฺตา คจฺฉนฺตี"ติ ปุจฺฉึสุ. ยถาผาสุกฏฺฐานํ อาวุโสติ. ภนฺเต อลมญฺญตฺถ คมเนน ราชุยฺยาเน วสถ, มยํ ภุตฺตปาตราสา อาคนฺตฺวา ธมฺมกถํ โสสฺสามาติ. ตาปสา อธิวาเสตฺวา อุยฺยานํ อคมํสุ. นาครา ภุตฺตปาตราสา สุทฺธวตฺถนิวตฺถา สุทฺธุตฺตราสงฺคา ๓- "ธมฺมกถํ โสสฺสามา"ติ สงฺฆสงฺฆีคณคณีภูตา ๔- อุยฺยานาภิมุขา อคมํสุ. ราชา

@๓ ฉ.ม. อยํ ปาโฐ น ทิสฺสติ ๔ ฉ.ม. สงฺฆา คณา คณีภูตา อุปริปาสาเท ฐิโต เต ตถา คจฺฉมาเน ทิสฺวา อุปฏฺฐากํ ปุจฺฉิ "กึ เอเต ภเณ นาครา สุทฺธวตฺถนิวตฺถา สุทฺธุตฺตราสงฺคา หุตฺวา อุยฺยานาภิมุขา คจฺฉนฺติ, กึ เอตฺถ สมชฺชํ วา นาฏกํ วา อตฺถี"ติ. นตฺถิ เทว, เอเต ตาปสานํ สนฺติเก ธมฺมกถํ ๑- โสตุกามา คจฺฉนฺตีติ. เตนหิ ภเณ อหํปิ คจฺฉิสฺสามิ, มยา สทฺธึ คจฺฉนฺตูติ. โส อาคนฺตฺวา ๒- เตสํ อาโรเจสิ "ราชาปิ คนฺตุกาโม, ราชานํ ปริวาเรตฺวาว คจฺฉถา"ติ. นาครา ปกติยาปิ อตฺตมนา ตํ สุตฺวา "อมฺหากํ ราชา อสฺสทฺโธ อปฺปสนฺโน ทุสฺสีโล, ตาปสา ธมฺมิกา, เต อาคมฺม ราชาปิ ธมฺมิโก ภวิสฺสตี"ติ อตฺตมนตรา อเหสุํ.