3. Paribbājakavagga

1. Cūḷavacchagottasuttavaṇṇanā

[185] Evamme sutanti cūḷavacchagottasuttaṃ. Tattha ekapuṇḍarīketi puṇḍarīko vuccati setambarukkho, so tasmiṃ ārāme eko puṇḍarīko atthīti ekapuṇḍarīko. Etadahosīti tattha pavisitukāmatāya ahosi. Cirassaṃ kho bhanteti pakatiyā āgatapubbataṃ upādāya. Dhammassa cānudhammanti idha sabbaññutañāṇaṃ dhammo nāma, mahājanassa byākaraṇaṃ anudhammo nāma. Sesaṃ jīvakasutte vuttanayameva. Na meti ananuññāya ṭhatvā anuññaṃpi paṭikkhipati. "sabbaññū sabbadassāvī aparisesaṃ ñāṇadassanaṃ paṭijānātī"ti hi idaṃ anujānitabbaṃ siyā, "carato ca me .pe. Paccupaṭṭhitan"ti idaṃ pana nānujānitabbaṃ. Sabbaññutañāṇena hi āvajjitvāva jānāti. Tasmā ananuññāya ṭhatvā anuññaṃpi paṭikkhipanto evamāha.

[186] Āsavānaṃ khayāti ettha sakiṃ khīṇāni āsavānaṃ puna khepetabbābhāvā yāvadevāti na vuttaṃ. Pubbenivāsañāṇena cettha bhagavā atītajānanaguṇaṃ dasseti, dibbacakkhuñāṇena paccuppannajānanaguṇaṃ, āsavakkhayañāṇena lokuttaraguṇanti. Iti imāhi tīhi vijjāhi sakalabuddhaguṇe saṅkhipitvā kathesi.