5. Māgaṇḍiyasuttavaṇṇanā

[207] Evamme sutanti māgaṇḍiyasuttaṃ. Tattha agyāgāreti aggihottasālāyaṃ. Tiṇasantharaketi dve māgaṇḍiyā mātulo ca bhāgineyyo ca. Tesu mātulo pabbajitvā arahattaṃ patto, bhāgineyyopi saupanissayo na cirasseva pabbajitvā arahattaṃ pāpuṇissati. Athassa bhagavā upanissayaṃ disvā ramaṇīyaṃ devagabbhasadisaṃ gandhakuṭiṃ pahāya tattha chārikatiṇakacavarādīhi ukkalāpe agyāgāre tiṇasantharakaṃ paññapetvā parasaṅgahakaraṇatthaṃ katipāhaṃ vasittha. Taṃ sandhāyetaṃ vuttaṃ. Tenupasaṅkamīti na kevalaṃ taṃdivasameva, yasmā pana taṃ agyāgāraṃ gāmūpacāre dārakadārikāhi otiṇṇaṃ avivittaṃ, tasmā bhagavā niccakālaṃpi divasabhāgaṃ tasmiṃ vanasaṇḍe vītināmetvā sāyaṃ vāsatthāya tattha upagacchati.

Addasā kho .pe. Tiṇasantharakaṃ paññattanti bhagavā aññesu divasesu tiṇasantharakaṃ saṅkharitvā saññāṇaṃ katvā ṭhapetvā gacchati, taṃdivasaṃ paññapetvāva