4. Ghoṭamukhasuttavaṇṇanā

[412] Evamme sutanti ghoṭamukhasuttaṃ. Tattha khemiyambavaneti evaṃnāmake ambavane. Dhammiko paribbajoti dhammikā pabbajjā. Adassanāti tumhādisānaṃ vā paṇḍitānaṃ adassanena. Yo vā panettha dhammoti yo vā pana ettha dhammo sabhāvoyeva, tasseva adassanena. Iminā "amhākaṃ kathā appamāṇaṃ, dhammova pamāṇan"ti dasseti. Tato thero "navauposathāgāre viya bahunā kammena idha bhavitabban"ti cintetvā caṅkamā oruyha paṇṇasālaṃ pavisitvā nisīdi. Taṃ dassetuṃ evaṃ vuttetiādi vuttaṃ.

[413] Cattārome brāhmaṇāti therassa kira etadahosi "ayaṃ brāhmaṇo `dhammikaṃ pabbajjaṃ upagato samaṇo vā brāhmaṇo vā natthī'ti vadati. Imassa cattāro puggale dve ca parisā dassetvā `catutthaṃ puggalaṃ katarāya parisāya bahulaṃ passasī'ti pucchissāmi, jānamāno `anāgāriyaparisāyan'ti vakkhati. Evametaṃ sakamukheneva `dhammiko paribbajo atthī'ti vadāpessāmī"ti imaṃ desanaṃ ārabhi.

[414] Tattha sārattarattāti suṭṭhu rattarattā. Sānugahā vācā bhāsitāti sakāraṇā vācā bhāsitā. Vuttaṃ hetaṃ mayā "amhākaṃ kathā appamāṇaṃ, dhammova pamāṇan"ti.