Bodhisatto "sādhu ācariya tumhehi vuttaṭṭhāne vasissāmī"ti heṭṭhāgaṅgāya vasanto "gaṅgāya udakaṃ paṭisotaṃ sandatū"ti adhiṭṭhāsi. Jātimantatāpaso pātova gaṅgaṃ oruyha udakaṃ ācamati, jaṭā dhovati. Bodhisatto dantakaṭṭhaṃ khādanto piṇḍapiṇḍaṃ kheḷaṃ udake pāteti. Dantakaṭṭhaucchiṭṭhakaṃpi tattheva pavāheti. Yathāpetaṃ aññattha alaggitvā tāpasasseva jaṭāsu laggati, tathā adhiṭṭhāsi. Kheḷaṃpi dantakaṭṭhaṃpi tāpasassa jaṭāsuyeva patiṭṭhāti.

Tāpaso caṇḍālassidaṃ kammaṃ bhavissatīti vippaṭisārī hutvā gantvā pucchi "bho caṇḍāla idaṃ gaṅgāya udakaṃ tayā paṭisotagāmikatan"ti. Āma ācariyāti. Tenahi tvaṃ mā heṭṭhāgaṅgāya vasa. Uparigaṅgāya vasāti. Sādhu ācariya, tumhehi vuttaṭṭhāne vasissāmīti tattha vasanto iddhiṃ paṭipassambhesi, udakaṃ yathāgatikameva jātaṃ. Puna tāpaso tadeva byasanaṃ pāpuṇi. So puna gantvā bodhisattaṃ pucchi "bho caṇḍāla tvaṃ idaṃ gaṅgāya udakaṃ kālena paṭisotagāmiṃ kālena anusotagāmiṃ karosī"ti. Āma ācariyāti. Caṇḍāla tvaṃ sukhavihārīnaṃ pabbajitānaṃ sukhena vasituṃ na desi, sattame te divase sattadhā muddhā phalatūti. Sādhu ācariya, ahaṃ pana suriyassa uggantuṃ na dassāmīti.

Atha mahāsatto cintesi "etassa abhisāpo etasseva upari patissati, rakkhāmi nan"ti. Sattānudayatāya punadivase iddhiyā suriyassa uggantuṃ na adāsi. Iddhimato iddhivisayo nāma acinteyyo, tato paṭṭhāya aruṇuggamanaṃ.