Manussā "yakkhāvaṭṭo nu kho ayaṃ bhūtadevatānāgasupaṇṇāvaṭṭo"ti upaddavappattā "kinnu kho kātabban"ti cintetvā "rājakulaṃ nāma mahāpaññaṃ, lokassa hitaṃ cintetuṃ sakkoti, tattha gacchāmā"ti rājakulaṃ gantvā tamatthaṃ ārocesuṃ. Rājā sutvā bhītopi abhītākāraṃ katvā "tāta mā bhāyatha, imaṃ kāraṇaṃ gaṅgātīravāsī jātimantatāpaso jānissati, taṃ pucchitvā nikkaṅkhā bhavissāmā"ti katipāheneva atthacarakehi manussehi saddhiṃ tāpasaṃ upasaṅkamitvā katapaṭisanthāro tamatthaṃ pucchi. Tāpaso āha "āma mahārāja, eko caṇḍālo atthi, so imaṃ gaṅgāya udakaṃ kālena anusotagāmiṃ kālena paṭisotagāmiṃ karoti, mayā tadatthaṃ kiñci kathitaṃ atthi, taṃ pucchatha, so jānissatī"ti.
Rājā mātaṅgaisissa santikaṃ gantvā "bhante tumhe aruṇassa uggantuṃ na dethā"ti pucchi. Āma mahārājāti. Kiṃkāraṇā bhanteti. Jātimantatāpasakāraṇā mahārāja, jātimantatāpaso maṃ niraparādhaṃ abhisapi tena āgantvā maṃ vanditvā khamāpitakāle dassāmi mahārājā"ti. Rājā gantvā "etha ācariya tāpasaṃ khamāpethā"ti āha. Nāhaṃ mahārāja caṇḍālaṃ vandāmīti. Mā ācariya evaṃ karotha, janapadassa mukhaṃ passathāti. So puna paṭipakkhipiyeva. Rājā bodhisattaṃ upasaṅkamitvā "ācariyo khamāpetuṃ na icchatī"ti āha. Akhamāpite ahaṃ suriyaṃ na muñcāmīti. Rājā "ayaṃ khamāpetuṃ na icchati, ayaṃ akhamāpite suriyaṃ na muñcati, kiṃ amhākaṃ tena tāpasena, lokaṃ olokessāmā"ti "gacchatha bho tāpasasantikaṃ, taṃ hatthesu ca pādesu ca gahetvā mātaṅgaisissa pādamūle nipajjāpetvā khamāpetha etassa janapadānudayataṃ paṭiccā"ti āha. Te rājapurisā gantvā taṃ tathā katvā ānetvā mātaṅgaisissa pādamūle nipajjāpetvā khamāpesuṃ.
Ahaṃ nāma khamitabbaṃ khamāmi, apica kho pana etassa kathā etasseva upari patissati. Mayā suriye vissajjite suriyasmiṃ etassa matthake patissati, athassa sattadhā muddhā phalissati. Tañca kho panesa byasanaṃ mā pāpuṇātu, etha tumhe etaṃ galappamāṇe udake otāretvā mahantaṃ mattikāpiṇḍamassa sīse ṭhapetha. Athāhaṃ suriyaṃ vissajjissāmi. Suriyasmiṃ mattikāpiṇḍe patitvā taṃ sattadhā bhindissati. Athesa mattikāpiṇḍaṃ chaḍḍetvā nimmujjitvā aññena titthena uttaratu, iti naṃ vadatha, etassa sotthi bhavissatīti. Te manussā "evaṃ karissāmā"ti tathā kāresuṃ. Tassāpi tatheva sotthi jātā. So tato paṭṭhāya "jāti nāma akāraṇaṃ, pabbajitānaṃ abbhantare guṇova kāraṇan"ti jātigottamānaṃ pahāya nimmado ahosi.