Iti jātimantatāpase damite mahājano bodhisattassa thāmaṃ aññāsi, mahākolāhalaṃ jātaṃ. Rājā attano nagaraṃ gamanatthāya bodhisattaṃ yāci. Mahāsatto paṭiññaṃ datvā tāni ca asītibrāhmaṇasahassāni damissāmi, paṭiññañca mocissāmīti mejjharājassa nagaraṃ agamāsi. Brāhmaṇā bodhisattaṃ disvāva "bho ayaṃ so mahācoro āgato, idāneva sabbe ete mayaṃ ucchiṭṭhakaṃ khāditvā abrāhmaṇā jātāti amhe pākaṭe karissati, evaṃ no idhāpi āvāso na bhavissati. Paṭikacceva naṃ māressāmā"ti rājānaṃ pana upasaṅkamitvā āhaṃsu:- "mahārāja tumhe imaṃ caṇḍālapabbajitaṃ mā sādhurūpoti maññittha, esa garukamantaṃ jānāti, paṭhaviṃ gahetvā ākāsaṃ karoti, ākāsaṃ paṭhaviṃ, dūraṃ gahetvā santikaṃ karoti, santikaṃ dūraṃ, gaṅgaṃ nivattetvā uddhaṃgāminiṃ karoti, icchanto paṭhaviṃ ukkhipitvā pātetuṃ sakkoti. Parassa vā cittaṃ nāma sabbakālaṃ na sakkā gahetuṃ, ayaṃ idha patiṭṭhaṃ labhanto tumhākaṃ rajjaṃpi nāseyya, jīvitantarāyaṃpi vaṃsūpacchedaṃpi kareyya, amhākaṃ vacanaṃ karotha mahārāja, ajjeva imaṃ māretuṃ vaṭṭatī"ti.

Rājāno nāma parapattiyā honti, iti so bahunnaṃ kathāvasena niṭṭhaṅgato. Bodhisatto pana nagare piṇḍāya caritvā udakaphāsukaṭṭhāne missakodanaṃ bhuñjitvā rājuyyānaṃ gantvā niraparādhatāya nirāsaṅko maṅgalasilāpaṭṭe nisīdi.

Imassa rañño vijite aṭṭhamaṃ lohakūṭavassaṃ navamaṃ kalalavassaṃ vassi. Iti imassāpi raṭṭhe nava vuṭṭhiyo patitā. So ca rājā sapariso mahāniraye nibbatto. Tenāha saṅkiccapaṇḍito:-

upahacca manaṃ mejjho mātaṅgasmiṃ yasassine