sapārisajjo ucchinno mejjhāraññaṃ tadā ahūti.

Evaṃ mejjhāraññassa araññabhūtabhāvo veditabbo. Mātaṅgassa pana isino vasena tadeva mātaṅgāraññanti vuttaṃ.

[66] Pañhapaṭibhāṇānīti pañhābyākaraṇāni. Paccanīkaṃ kātabbanti paccanīkaṃ kātabbaṃ. Avamaññissanti vilomagāhaṃ gaṇhanto viya ahosinti attho.

[67] Anuviccakāranti anuvicāretvā cintetvā tulayitvā kātabbaṃ karohīti vuttaṃ hoti. Sādhu hotīti sundaro hoti. Tumhādisasmiñhi maṃ disvā maṃ saraṇaṃ gacchante nigaṇṭhaṃ disvā niganthaṃ saraṇaṃ gacchante "kiṃ ayaṃ upāli diṭṭhadiṭṭhameva saraṇaṃ gacchatī"ti garahā uppajjati, tasmā anuviccakāro tumhādisānaṃ sādhūti dasseti. Paṭākaṃ parihareyyunti te kira evarūpaṃ sāvakaṃ labhitvā "asuko nāma rājā vā rājamahāmatto vā seṭṭhī vā amhākaṃ saraṇaṃ gato sāvako jāto"ti paṭākaṃ upkhipitvā nagare ugghosentā āhiṇḍanti. Kasmā? evaṃ no mahantabhāvo āvibhavissatīti ca, sace tassa "kimahaṃ etena Saraṇaṃ gato"ti vippaṭisāro uppajjeyya, taṃpi so "ete sabbe saraṇagatabhāvaṃ bahū jānanti, dukkhaṃ idāni paṭinivattitun"ti vinodetvā na paṭikkamissatīti ca tenāhaṃ "paṭākaṃ parihareyyun"ti.