[141] Khippameva vūpasammatīti lahuṃ vūpasammati, na dīghasuttaṃ hoti. Ussukkāpannā bhikkhū "āvuso ayaṃ subbaco bhikkhu, janapadavāsino nāma gāmantasenāsane vasanaṭṭhānanisajjādīni na phāsukāni honti, bhikkhācāropi dukkho hoti, sīghamassa adhikaraṇaṃ vūpasamemā"ti sannipatitvā āpattito vuṭṭhāpetvā suddhante patiṭṭhāpenti.

[142] Adhiccāpattikoti kadāci āpajjati. So kiñcāpi lajjī hoti pakatatto, dubbacattā panassa bhikkhū tatheva paṭipajjanti.

[144] Saddhāmattakena vahati pemamattakenāti ācariyūpajjhāyesu appamattikāya gehassitasaddhāya appamattakena gehassitapemena yāpeti. Paṭisandhiggahaṇasadisā hi ayaṃ pabbajjā nāma, navapabbajito pabbajjāya guṇaṃ ajānanto ācariyūpajjhāyesu pemamattena yāpeti, tasmā evarūpā saṅgaṇhitabbā anuggaṇhitabbā. Appamattakaṃpi hi saṅgahaṃ labhitvā pabbajjāya ṭhitā abhiññāppattā mahāsamaṇā bhavissanti. Ettakena kathāmaggena "ovaditabbayuttakaṃ ovadanti, na itaran"ti idameva bhagavatā dassitaṃ.