@4 cha.Ma. tiṇasanthāraketi 5 cha.Ma. okiṇṇaṃ 6 Sī. saṃharitvā, cha.Ma. saṅgharitvā

@7 cha.Ma. ayaṃ pāṭho na dissati Agamāsi. Kasmā? tadā hi paccūsasamaye lokaṃ oloketvāva addasa "ajja māgaṇḍiyo idhāgantvā imaṃ tiṇasantharakaṃ disvā bhāradvājena saddhiṃ tiṇasantharakaṃ ārabbha kathāsallāpaṃ karissati, athāhaṃ āgantvā dhammaṃ desissāmi, so dhammaṃ sutvā mama santike pabbajitvā arahattaṃ pāpuṇissati. Paresaṃ saṅgahakaraṇatthameva hi mayā pāramiyo pūritā"ti tiṇasantharakaṃ paññapetvāva agamāsi.

Samaṇaseyyānurūpaṃ maññeti imaṃ tiṇasantharakaṃ "samaṇassa anucchavikā seyyā"ti maññati. Na ca asaññatasamaṇassa vuṭṭhānametaṃ. Tathāhettha hatthena ākaḍḍhitaṭṭhānaṃ vā pādena ākaḍḍhitaṭṭhānaṃ vā sīsena pahataṭṭhānaṃ vā na paññāyati, anākulo aghaṭṭito abhinno chekena cittakārena tulikāya paricchinditvā paññatto viya. Saññatasamaṇassa vasitaṭṭhānaṃ, kassa bho vasitaṭṭhānanti pucchati. Bhūnahunoti hatavuḍḍhino mariyādakārakassa. Kasmā evamāha? chasu dvāresu vuḍḍhipaññāpanaladdhikattā. Ayañhi tassa laddhi:- cakkhu brūhetabbaṃ vaḍḍhetabbaṃ, adiṭṭhaṃ dakkhitabbaṃ, diṭṭhaṃ samatikkamitabbaṃ. Sotaṃ brūhetabbaṃ vaḍḍhetabbaṃ, asutaṃ sotabbaṃ, sutaṃ samatikkamitabbaṃ. Ghānaṃ brūhetabbaṃ vaḍḍhetabbaṃ, aghāyitaṃ ghāyitabbaṃ, ghāyitaṃ samatikkamitabbaṃ. Jivhā brūhetabbā vaḍḍhetabbā, asāyitaṃ sāyitabbaṃ, sāyitaṃ samatikkamitabbaṃ. Kāyo brūhetabbo vaḍḍhetabbo, aphuṭṭhaṃ phusitabbaṃ, phuṭṭhaṃ samatikkamitabbaṃ. Mano brūhetabbo vaḍḍhetabbo, aviññātaṃ vijānitabbaṃ, viññātaṃ samatikkamitabbaṃ. Evaṃ so chasu dvāresu vuḍḍhiṃ paññapeti bhagavā pana:-

"cakkhunā saṃvaro sādhu sādhu sotena saṃvaro