Viddheti ubbiddhe, meghavigamena dūrībhūteti attho. Vigatavalāhaketi apagatameghe. Deveti vasse. Osadhitārakāti sukkatārakā. Sā hi yasmā tassā udayato paṭṭhāya tena saññāṇena osadhāni gaṇhantīti vadanti, tasmā "osadhitārakā"ti vuccati. Abhido aḍḍharattasamayanti abhinne aḍḍharattasamaye. Iminā gaganamajjhe ṭhitaṃ candaṃ dasseti. Abhido majjhantikepi eseva nayo.

Tato khoti ye anubhonti, tehi bahutarā, bahū ceva bahutarā cāti attho. Ābhā nānubhontīti obhāsaṃ na valañjanti, attano sarīrobhāseneva ālokaṃ pharitvā viharanti.

[274] Idāni yasmā so "ekantasukhaṃ lokaṃ pucchissāmī"ti nisinno, pucchāmuḷho pana jāto, tasmā naṃ bhagavā taṃ pucchaṃ sarāpento kiṃ pana udāyi atthi ekantasukho lokotiādimāha. Tattha ākāravatīti kāraṇavatī. Aññataraṃ vā pana tapoguṇanti acelakaladdhiṃ sandhāyāha, surāpānaviratīti attho.

[275] Katamā pana sā bhante ākāravatī paṭipadā ekantasukhassāti kasmā pucchati? evaṃ kirassa ahosi "mayaṃpi attānaṃ ekantasukhaṃ vadāma, paṭipadaṃ pana kālena sukhaṃ kālena dukkhaṃ vadāma. Ekantasukhassa kho pana attano paṭipadāyapi ekantasukhāya bhavitabbaṃ. Amhākaṃ kathā aniyyānikā satthukathāva niyyānikā"ti. Idāni satthāraṃyeva pucchitvā jānissāmīti tasmā pucchati.