"yo hi koci manussesu vohāraṃ upajīvati

evaṃ vāseṭṭhā jānāhi vāṇijo so na brāhmaṇo"ti.

Ayaṃ byavahāravohāro nāma. "saṅkhā samaññā paṇṇatti vohāro"ti ayaṃ paṇṇattivohāro nāma. "tathā tathā voharati aparāmāsan"ti ayaṃ vacanavohāro nāma. "aṭṭha ariyavohārā aṭṭha anariyavohārā"ti ayaṃ cetanāvohāro nāma, ayamettha adhippeto. Yasmā vā pabbajitakālato paṭṭhāya gihīti cetanā natthi, samaṇoti cetanā hoti. Gihīti vacanaṃ natthi, samaṇoti vacanaṃ hoti. Gihīti paṇṇatti natthi, samaṇoti paṇṇatti hoti. Gihīti byavahāro natthi, samaṇoti vā pabbajitoti vā byavahāro hoti. Tasmā sabbepete labbhanti.

[33] Yesaṃ kho ahaṃ saṃyojanānaṃ hetu pāṇātipātīti ettha pāṇātipātova saṃyojanaṃ. Pāṇātipātasseva hi hetu pāṇātipātapaccayā pāṇātipātī nāma hoti. Pāṇātipātānaṃ pana bahutāya "yesaṃ kho ahan"ti vuttaṃ. Tesāhaṃ saṃyojanānanti tesaṃ ahaṃ pāṇātipātabandhanānaṃ. Pahānāya samucchedāya paṭipannoti iminā apāṇātipātasaṅkhātena kāyikasīlasaṃvarena pahānatthāya samucchedanatthāya paṭipanno.