[47] Yānaṃ oropeyyāti purisānucchavikaṃ yānaṃ oropeyya. Pavaramaṇikuṇḍalanti nānappakāraṃ uttamamaṇiñca kuṇḍalañca. Sāniharantīti attano bhaṇḍakāni gaṇhanti.

[48] Sampannaphalanti madhuraphalaṃ. Upapannaphalanti phalūpapannaṃ bahuphalaṃ.

[49] Anuttaranti uttamaṃ pabhassaraṃ nirupakkilesaṃ.

[50] Ārakā ahaṃ bhanteti paṭhavito nabhaṃ viya samuddassa orimatīrato paratīraṃ viya ca suvidūravidūre ahaṃ. Anājānīyeti gihivohārasamucchedanassa kāraṇaṃ ajānanake. Ājānīyabhojananti kāraṇaṃ jānantehi bhuñjitabbabhojanaṃ. Anājānīyabhojananti kāraṇaṃ ajānantehi bhuñjitabbabhojanaṃ. Sesaṃ sabbattha uttānamevāti.