Tassapi upāsakassa etadahosi "mucchāvasena asaññībhūtānañhi sattāhaṃpi assāsapassāsā nappavattanti, cittasantatipavattimatteneva pana te matāti na vuccanti. Yadā nesaṃ cittaṃ nappavattati, tadā `matā ete nīharitvā jhāpethāti vattabbataṃ āpajjati. Kāyadaṇḍo nirīho abyāpāro, tathā vacīdaṇḍo. Citteneva pana tesaṃ cutipi paṭisandhipi hoti. Itipi manodaṇḍova mahanto. Bhijjitvāpi cutipaṭisandhiākaḍḍhanato eseva mahanto. Amhākaṃ pana mahāniganthassa kathā aniyyānikā"ti sallakkhesi. Bhagavato pana vicittāni pañhāpaṭibhāṇāni sotukāmo na tāva anujānāti.

@3 cha.Ma. visahati 4 cha.Ma. manodaṇḍova

Na kho te sandhiyatīti na kho te ghaṭiyati. Purimena vā pacchimanti "kāyadaṇḍo mahanto"ti iminā purimavacanena idāni "manodaṇḍo mahanto"ti idaṃ vacanaṃ. Pacchimena vā purimanti tena vā pacchimena aduṃ purimavacanaṃ na ghaṭiyati.