Senāpati sabbapacchā suṇitvā "mayhaṃ kira satthāraṃ bhagavantaṃ puññakkhettaṃ saggasopānaṃ evaṃ ghaṭṭayiṃsū"ti usumajātahadayo mukhena assasanto vegena rājuyyānaṃ gantvā tathābyasanappattaṃ isiṃ disvā kacchaṃ bandhitvā dvīhi hatthehi dantakaṭṭhe apabyūhitvā ukkhipitvā nisīdāpetvā udakaṃ āharāpetvā nhāpetvā sabbaosathehi ceva catujātigandhehi ca sarīraṃ ubbaṭṭetvā sukhumasāṭakena puñchitvā purato añjaliṃ katvā ṭhito evamāha "bhante ayuttaṃ manussehi kataṃ, etesaṃ kiṃ bhavissatī"ti. Devatā senāpati tidhā bhinnā, ekaccā "rājānameva nāsessāmā"ti vadanti, ekaccā "saddhiṃ parisāya rājānan"ti, ekaccā "raññova jitaṃ sabbaṃ nāsessāmā"ti. Idaṃ vatvā ca pana tāpaso appamattakaṃ kopaṃ akatvā lokassa santiupāyameva ācikkhanto āha "aparādho nāma hoti, accayaṃ pana desetuṃ jānantassa pākatikameva hotī"ti.

Senāpati nayaṃ labhitvā rañño santikaṃ gantvā rājānaṃ vanditvā "mahārāja tumhehi nirāparādhe mahiddhike tāpase aparajjhantehi bhāriyaṃ kammaṃ kataṃ, devatā kira tidhā bhinnā evaṃ vadantī"ti sabbaṃ ārocetvā "khamāpite

@3 cha.Ma. āgantvā 4 cha.Ma. dantakaṭṭhāni apaviyūhitvā 5 cha.Ma. rañño vijitaṃ