@6 cha.Ma. appamattakampi Kira mahārāja pākatikaṃ hoti, raṭṭhaṃ mā nāsetha, tāpasaṃ khamāpethā"ti āha. Rājā attanā dosaṃ kataṃ disvāpi evaṃ vadeti "na taṃ khamāpessāmī"ti. Senāpati yāvatatiyaṃ yācitvā anicchantaṃ āha "ahaṃ mahārāja tāpasassa balaṃ jānāmi, na so abhūtavādī, nāpi kupito, sattānudayena pana evamāha, khamāpetha naṃ mahārājā"ti. Na khamāpemīti. Tenahi senāpatiṭṭhānaṃ aññassa detha, ahaṃ tumhākaṃ āṇāpavattiṭṭhāne na vasissāmīti. Tvaṃyeva yenakāmaṃ gaccha, ahaṃ mayhaṃ senāpatiṃ labhissāmīti. Tato senāpati tāpasassa santikaṃ āgantvā vanditvā "kathaṃ paṭipajjāmi bhante"ti āha. Senāpati ye te vacanaṃ suṇanti, sabbe saparikkhāre sadhane sadvipadacatuppade gahetvā sattadivasabbhantare bahirajjasīmaṃ gacchantu, devatā ativiya kupitā dhuvaṃ raṭṭhapīḷaṃ karissantīti. Senāpati tathā akāsi.

Rājā tattha mattoyeva amittamathanaṃ katvā janapadaṃ vūpasametvā āgamma jayakhandhāvāraṭṭhāne nisīditvā nagaraṃ paṭijaggāpetvā antonagaraṃ pāvisi. Devatā paṭhamaṃyeva udakavuṭṭhiṃ pātayiṃsu. Mahājano attamano ahosi "kūṭajaṭilaṃ aparaddhakālato paṭṭhāya amhākaṃ rañño vuḍḍhiyeva, amitte nimmathesi, āgatadivaseyeva devo vuṭṭho"ti. Devatā puna sumanapupphavuṭṭhiṃ pātayiṃsu, mahājano attamanataro ahosi. Devatā puna māsakavuṭṭhiṃ pātayiṃsu. Tato kahāpaṇavuṭṭhiṃ, tato kahāpaṇatthaṃ na nikkhameyyunti maññamānā hatthūpagapādūpagādikatabhaṇḍavuṭṭhiṃ pātesuṃ. Mahājano sattabhūmikapāsāde ṭhitopi otaritvā ābharaṇāni pilandhanto attamano ahosi. "arahati vata kūṭajaṭile kheḷapātanaṃ, tassa upari kheḷapātitakālato paṭṭhāya amhākaṃ rañño vuḍḍhi jātā, amittamathanaṃ kataṃ, āgatadivaseyeva devo vassi, tato sumanavuṭṭhi māsakavuṭṭhi kahāpaṇavuṭṭhi katabhaṇḍavuṭṭhīti catasso vuṭṭhiyo jātā"ti attamanavācaṃ nicchāretvā rañño katapāpe samanuñño jāto.