So dhammakathā- pariyosāne "ācariyā sve mayhaṃ gehe bhikkhaṃ gaṇhathā"ti nimantetvā agamāsi. So dutiyadivase mahante mahante koḷumbe āharāpetvā gūthassa pūrāpetvā kadalipattehi nesaṃ mukhāni bandhāpetvā tattha tattha ṭhapāpesi, puna bahalamadhuka- telanāgavasāpicchillādīnaṃ kūṭe pūretvā nisseṇimatthake ṭhapāpesi, tattheva ca mahāmalle bandhakacche hatthehi muggare gāhāpetvā ṭhapetvā āha "kūṭatāpasā ativiya maṃ viheṭhayiṃsu, tesaṃ pāsādato otaraṇakāle kūṭehi picchillaṃ sopāna- matthake vissajjetvā sīse muggarehi poṭhetvā gale gahetvā sopāne khipathā"ti. Sopānapādamūle pana caṇḍe kukkure bandhāpesi.

Tāpasāpi "sve rājagehe bhuñjissāmā"ti aññamaññaṃ ovadiṃsu "mārisā rājagehaṃ nāma sāsaṅkaṃ sappaṭibhayaṃ, pabbajitehi nāma chadvārārammaṇasaññatehi bhavitabbaṃ, diṭṭhadiṭṭhe ārammaṇe nimittaṃ na gahetabbaṃ, cakkhudvāre saṃvaro paccupaṭṭhapetabbo"ti.

Punadivase bhikkhācāravelaṃ sallakkhetvā vākacīraṃ nivāsetvā ajinacammaṃ ekaṃsagataṃ karitvā jaṭākalāpaṃ saṇṭhapetvā bhikkhābhājanaṃ gahetvā paṭipāṭiyā rājanivesanaṃ abhiruḷhā. Rājā āruḷhabhāvaṃ ñatvā gūthakoḷumbamukhato kadalipattaṃ nīharāpesi. Duggandho tāpasānaṃ nāsapuṭaṃ paharitvā matthaluṅgapātanākārappatto ahosi. Mahātāpaso rājānaṃ olokesi. Rājā "etha bhonto yāvadatthaṃ bhuñjantu ceva harantu ca, tumhākaṃ etaṃ anucchavikaṃ, hiyyo ahaṃ tumhe paggahessāmīti āgato, tumhe pana maṃyeva ghaṭṭentā vijjhantā parisamajjhe kathayittha, tumhākaṃ idaṃ anucchavikaṃ, bhuñjathā"ti mahātāpasassa uḷuṅkena gūthaṃ upanāmesi. Tāpaso dhī dhīti vadanto paṭinivatti. "ettakeneva gacchissatha tumhe"ti sopāne kūṭehi picchillaṃ vissajjāpetvā mallānaṃ saññamakāsi. Mallā muggarehi sīsāni poṭhetvā gīvāyaṃ gahetvā sopāne khipiṃsu. Ekopi sopāne patiṭṭhātuṃ nāsakkhi, pavattamānā sopānapādamūlaṃyeva pāpuṇiṃsu. Sampatte sampatte caṇḍakukkurā