Atīte pana bārāṇasīnagare diṭṭhamaṅgalikā nāma cattāḷīsakoṭivibhavassa seṭṭhino ekā dhītā ahosi dassanīyā pāsādikā. Sā rūpabhogakulasampatta- sampannatāya bahunnaṃ patthanīyā ahosi. Yo yo panassā vāreyyatthāya pahiṇati tantaṃ disvānassa jātiyaṃ vā hatthapādādīsu vā yattha katthaci dosaṃ āropetvā "ko esa dujjāto dussaṇṭhito"tiādīni vatvā "nīharatha nan"ti nīharāpetvā "evarūpaṃpi nāma addasaṃ, udakaṃ āharatha, akkhīni dhovissāmī"ti akkhīni dhovati. Tassā diṭṭhaṃ diṭṭhaṃ vippakāraṃ pāpetvā nīharāpetīti diṭṭhamaṅgalikātveva cassā saṅkhā udapādi, mūlanāmaṃ antaradhāyi.

Sā ekadivasaṃ gaṅgāya udakakīḷaṃ kīḷissāmīti titthaṃ sajjāpetvā pahūtaṃ khādanīyaṃ bhojanīyaṃ sakaṭesu pūrāpetvā bahūni gandhamālādīni ādāya paṭicchanna- yānaṃ āruyha ñātigaṇaparivutā gehamhā nikkhami. Tena ca samayena mahāpuriso caṇḍālayoniyaṃ nibbatto bahinagare cammagehe vasati, mātaṅgotvevassa nāmaṃ

@4 Ma. pahiyyati, cha. pahiṇāti 5 cha.Ma. ayaṃ pāṭho na dissati Ahosi. So soḷasavassuddesiko hutvā kenacideva karaṇīyena antonagaraṃ pavisitukāmo ekaṃ nīlapilotikaṃ nivāsetvā ekaṃ hatthe bandhitvā ekena hatthena pacchiṃ, ekena ghaṇḍaṃ gahetvā "ussaratha ayyā, caṇḍālohan"ti jānāpanatthaṃ taṃ taṃ vārento nīcacittaṃ paccupaṭṭhapetvā diṭṭhadiṭṭhe manusse namassamāno nagaraṃ pavisitvā mahāpathaṃ paṭipajji.