Seṭṭhissa ārocesuṃ "mātaṅgo te sāmi gehaṅgaṇe patito"ti. Gacchatha bhaṇe, kiṃ kāraṇāti vatvā ekaṃ māsakaṃ datvā uṭṭhāpethāti. Te gantvā "imaṃ kira māsakaṃ gahetvā uṭṭhāhī"ti vadiṃsu. So "nāhaṃ māsakatthāya nipanno, diṭṭhamaṅgalikāya svāhaṃ nipanno"ti āha. Diṭṭhamaṅgalikāya ko dosoti. Kinti tassā dosaṃ na passatha, niraparādho ahaṃ tassā manussehi byasanaṃ pāpito, taṃ labhantova uṭṭhahissāmi, alabhantova na uṭṭhahissāmīti.

Te gantvā seṭṭhissa ārocesuṃ. Seṭṭhī dhītudosaṃ ñatvā "gacchatha, ekaṃ kahāpaṇaṃ dethā"ti pesesi. So "na icchāmi kahāpaṇaṃ, kaññameva icchāmī"ti āha. Taṃ sutvā seṭṭhī ca seṭṭhibhariyā ca "ekāyeva no piyadhītā, paveṇiyā ghaṭako añño dārakopi natthī"ti saṃvegappattā "gacchatha tāta, koci amhākaṃ asahanako etaṃ jīvitāpi voropeyya, etasmiṃ hi mate sabbe mayaṃ naṭṭhā homa, ārakkhamassa gaṇhathā"ti parivāretvā ārakkhaṃ saṃvidhāya yāguṃ pesayiṃsu bhattaṃ dhanaṃ pesayiṃsu, evaṃ so sabbaṃ paṭikkhipi. Evaṃ eko divaso gato, dve, tayo, cattāro, pañca divasā gatā.

Tato sattasattagehavāsikā uṭṭhāya "na sakkoma mayaṃ tumhe nissāya caṇḍālā bhavituṃ, amhe mā nāsetha, tumhākaṃ dārikaṃ datvā etaṃ uṭṭhāpethā"ti āhaṃsu. Te sataṃpi sahassaṃpi satasahassaṃpi pahiṇiṃsu, so paṭikkhipateva. Evaṃ cha divasā gatā. Sattame divase ubhato cuddasagehavāsikā sannipatitvā "na mayaṃ caṇḍālā bhavituṃ sakkoma, tumhākaṃ akāmakānaṃpi mayaṃ etassa dārikaṃ dassāmā"ti āhaṃsu.