@4 cha.Ma. ayaṃ pāṭho na dissati 5 cha.Ma. ukkaṇṭhitthāti 6 Ma. avassayo

Evaṃ vutte diṭṭhamaṅgalikā "pakatiyāpi ahaṃ sāmi mukhadoseneva byasanaṃ pattā, na sakkhissāmevāhaṃ vattun"ti āha. Bodhisatto "kiṃ pana tayā mayhaṃ agāre vasantassa alikavacanaṃ sutapubbaṃ, ahaṃ tadāpi alikaṃ na bhaṇāmi, idāni pabbajito kiṃ vakkhāmi, saccavādī puriso nāmāhan"ti vatvā "ajja pakkhassa aṭṭhamī, tvaṃ `ito sattāhassa accayena uposathadivase mayhaṃ sāmiko mahābrahmā candamaṇḍalaṃ bhinditvā mama santikaṃ āgamissatī'ti sakalanagare ugghosehī"ti vatvā pakkāmi.

Sā saddahitvā haṭṭhatuṭṭhā sūrā hutvā sāyaṃ pātaṃ nagaraṃ pavisitvā tathā ugghosesi. Manussā pāṇinā pāṇiṃ paharantā "passatha, amhākaṃ diṭṭha- maṅgalikā caṇḍālaputtaṃ mahābrahmānaṃ karotī"ti hasantā keḷiṃ karonti. Sā punadivasepi tatheva sāyaṃ pātaṃ pavisitvā "idāni chāhaccayena, pañcāha, catūha, tīha dvīha, ekāhaccayena mayhaṃ sāmiko mahābrahmā candamaṇḍalaṃ bhinditvā mama santikaṃ āgamissatī"ti ugghosesi.

Brāhmaṇā cintayiṃsu "ayaṃ diṭṭhamaṅgalikā atisūrā hutvā katheti, kadāci evaṃ siyā, etha mayaṃ diṭṭhamaṅgalikāya vasanaṭṭhānaṃ paṭijaggāmā"ti cammagehassa bāhirabhāgaṃ samantā tacchāpetvā vālikaṃ okiriṃsu. Sāpi uposathadivase pātova nagaraṃ pavisitvā "ajja kira mayhaṃ sāmiko āgamissatī"ti ugghosesi. Brāhmaṇā cintayiṃsu "ayaṃ bho na dūraṃ apadissati, ajja kira mahābrahmā āgamissati, vasanaṭṭhānaṃ saṃvidahāmā"ti cammagehaṃ sammajjāpetvā haritūpalittaṃ katvā ahata- vatthehi parikkhipitvā mahārahaṃ pallaṅkaṃ attharitvā upari celavitānaṃ bandhitvā gandhamālādāmāni osārayiṃsu. Tesaṃ paṭijaggantānaṃyeva suriyo atthaṅgato.