Bahinagarato antonagare yāva maṇḍapā āgacchantiyā laddhadhanaṃyeva koṭisatamattaṃ ahosi.
Sakalajambūdīpo saṅkhubhi tato sabbe rājāno "brahmapajāpatiyā pāda- dhovanena abhisekaṃ karissāmā"ti satasahassaṃ pesetvā labhiṃsu. Maṇḍape vasantiyāeva gabbhavuṭṭhānaṃ ahosi. Mahāpurisaṃ paṭicca laddhakumāro pāsādiko ahosi lakkhaṇa- sampanno. Mahābrahmuno putto jātoti sakalajambūdīpo ekakolāhalo ahosi. Kumārassa khīramaṇimūlaṃ hotūti tato tato āgatadhanaṃ koṭisahassaṃ ahosi. Ettāvatā nivesanaṃpi niṭṭhitaṃ. Kumārassa nāmakaraṇaṃ karissāmāti nivesanaṃ sajjetvā kumāraṃ gandhodakena nhāpetvā alaṅkaritvā maṇḍape jātattā maṇḍabyotveva nāmaṃ akaṃsu.
Kumāro sukhena saṃvaḍḍhamāno sippuggahaṇavayappatto sakalajambūdīpe sippajānanakā tassa santikaṃ āgantvā sippaṃ sikkhāpenti. Kumāro medhāvī paññavā sutaṃ sutaṃ muttaṃ āvuṇanto viya gaṇhāti, gahitaṃ gahitaṃ suvaṇṇaghaṭe pakkhittatelaṃ viya tiṭṭhati. Yāvatā vācuggatā pariyatti atthi, tena anuggahitā nāma nāhosi. Brāhmaṇā taṃ parivāretvā caranti, sopi brāhmaṇabhato ahosi. Gehe asīti brāhmaṇasahassāni niccabhattaṃ bhuñjanti. Gehaṃpissa sattadvāra- koṭṭhakaṃ mahantaṃ ahosi. Gehe maṅgaladivase jambūdīpavāsīhi pesitadhanaṃ koṭisata- sahassamattaṃ ahosi.
Bodhisatto pana āvajjesi "pamatto nu kho kumāro appamatto"ti. Athassa taṃ pavattiṃ ñatvā "brāhmaṇabhato jāto, yattha dinnaṃ mahapphalaṃ hoti, taṃ na jānāti, gacchāmi naṃ damemī"ti cīvaraṃ pārupitvā bhikkhābhājanaṃ gahetvā "dvārakoṭṭhakā atisambādhā, na sakkā koṭṭhakena pavisitun"ti ākāsenāgantvā asītiyā brāhmaṇasahassānaṃ bhuñjanaṭṭhāne ākāsaṅgaṇe otari. Maṇḍabya- kumāropi suvaṇṇakaṭacchuṃ gāhāpetvā "idha sūpaṃ detha idha odanan"ti parivisāpento bodhisattaṃ disvā daṇḍakena ghaṭṭitaāsīviso viya kupitvā imaṃ gāthamāha:-