TIPITAKA Volume 13 : PALI ROMAN Sutta Pitaka Vol 5 : Sutta. Ma. Ma. Dhammacetiyasuttaṃ

[559] Evamme sutaṃ ekaṃ samayaṃ bhagavā sakkesu viharati medaḷupaṃ nāma sakyānaṃ nigamo . tena kho pana samayena rājā pasenadi kosalo nagarakaṃ 1- anuppatto hoti kenacideva karaṇīyena. Atha kho rājā pasenadi kosalo dīghaṃ kārāyanaṃ āmantesi yojehi samma kārāyana bhadrāni bhadrāni yānāni uyyānabhūmiyaṃ gacchāma subhūmiṃ dassanāyāti . evaṃ devāti kho dīgho kārāyano rañño pasenadissa kosalassa paṭissutvā bhadrāni bhadrāni yānāni yojāpetvā rañño pasenadissa kosalassa paṭivedesi yuttāni kho te deva bhadrāni bhadrāni yānāni yassadāni kālaṃ maññasīti.