๑๐. สงฺขารูปปตฺติสุตฺตวณฺณนา

[๑๖๐] เอวมฺเม สุตนฺติ สงฺขารูปปตฺติสุตฺตํ. ตตฺถ สงฺขารูปปตฺตินฺติ ๑- สงฺขารานํเยว อุปปตฺตึ, ๒- น สตฺตสฺส, น โปสสฺส, ปุญฺญาภิสงฺขาเรน วา ภวูปคกฺขนฺธานํ อุปปตฺตึ.

[๑๖๑] สทฺธาย สมนฺนาคโตติ สทฺธาทโย ปญฺจ ธมฺมา โลกิกา ทหตีติ ฐเปติ. อธิฏฺฐาตีติ ปติฏฐาเปติ. สงฺขารา จ วิหารา ๓- จาติ สห ปตฺถนาย สทฺธาทโยว ปญฺจ ธมฺมา. ตตฺรูปปตฺติยาติ ตสฺมึ ฐาเน นิพฺพตฺตนตฺถาย. อยํ มคฺโค อยํ ปฏิปทาติ สห ปตฺถนาย ปญฺจ ธมฺมาว. ยสฺส หิ ปญฺจ ธมฺมา อตฺถิ, น ปตฺถนา, ตสฺส คติ อนิพทฺธา. ยสฺส ปตฺถนา อตฺถิ, น ปญฺจ ธมฺมา, ตสฺสปิ อนิพทฺธา จ. ๔- เยสํ อุภยมตฺถิ, เตสํ คติ นิพทฺธา. ยถา หิ อากาเส ขิตฺตทณฺโฑ อคฺเคน วา มชฺเฌน วา มูเลน วา นิปติสฺสตีติ นิยโม นตฺถิ, เอวํ สตฺตานํ ปฏิสนฺธิคหณํ อนิยตํ. ตสฺมา กุสลกมฺมํ กตฺวา เอกสฺมึ ฐาเน ปตฺถนํ กาตุํ วฏฺฏติ.

[๑๖๕] อามณฺฑนฺติ อามลกํ. ยถา ตํ ปริสุทฺธจกฺขุสฺส ปุริสสฺส สพฺพโสว ปากฏํ โหติ, เอวํ ตสฺส พฺรหฺมุโน สทฺธึ ตตฺถ นิพฺพตฺตสตฺเตหิ สหสฺสีโลกธาตุ. เอส นโย สพฺพตฺถ.