๘. อานาปานสฺสติสุตฺตวณฺณนา

[๑๔๔] เอวมฺเม สุตนฺติ อานาปานสฺสติสุตฺตํ. ตตฺถ อญฺเญหิ จาติ ฐเปตฺวา ปาฬิยํ อาคเต ทส เถเร อญฺเญหิปิ อภิญฺญาเตหิ พหูหิ สาวเกหิ สทฺธึ. ตทา กิร มหาภิกฺขุสํโฆ อโหสิ อปริจฺฉินฺนคณโน.

โอวทนฺติ อนุสาสนฺตีติ อามิสสงฺคเหน ธมฺมสงฺคเหน จาติ ทฺวีหิ สงฺคเหหิ สงฺคณฺหิตฺวา กมฺมฏฺฐาโนวาทานุสาสนีหิ โอวทนฺติ จ อนุสาสนฺติ จ. เต จาติ จกาโร อาคมสนฺธิมตฺตํ. โอฬารํ ปุพฺเพนาปรํ วิเสสํ ปชานนฺตีติ สีลปริปูรณาทิโต ปุพฺพวิเสสโต อุฬารตรํ อปรํ กสิณปริกมฺมาทิวิเสสํ ชานนฺตีติ อตฺโถ.