ปวตฺเต ปน จกฺกรตเน ตํ อนุพนฺธมาโนว ราชา จกฺกวตฺตี ยานวรํ อารุยฺห เวหาสํ อพฺภุคฺคจฺฉติ. อถสฺส ฉตฺตจามราทิหตฺโถ ๓- ปริชโน เจว อนฺเตปุรชโน จ. ตโต นานปฺปการกญฺจุกกวจาทิสนฺนาหวิภูสิเตน วิวิธาภรณปฺปภาสมุชฺชลิเตน ๔- ธชปฏากปฏิมณฺฑิเตน อตฺตโน พลกาเยน ๕- สทฺธึ อุปราชเสนาปติปฺปภูตโยปิ เวหาสํ อพฺภุคฺคนฺตฺวา ราชานเมว ปริวาเรนฺติ. ราชยุตฺตา ปน ชนสงฺคหตฺถํ นครวีถีสุ เภริโย จราเปนฺติ "ตาตา อมฺหากํ รญฺโญ นิพฺพตฺตํ จกฺกรตนํ ๖- อตฺตโน อตฺตโน วิภวานุรูเปน มณฺฑิตปสาธิตา สนฺนิปตถา"ติ. มหาชโน ปน ปกติยา จกฺกรตนสทฺเทเนว สพฺพกิจฺจานิ ปหาย คนฺธปุปฺผาทีนิ อาทาย สนฺนิปติโตว, โสปิ สพฺโพ เวหาสํ อพฺภุคฺคนตฺวา ราชานเมว ปริวาเรติ. ยสฺส ยสฺส หิ รญฺญา สทฺธึ คนฺตุกามตา อุปฺปชฺชติ. โส โส อากาสคโต โหติ. เอวํ ทฺวาทสโยชนายามวิตฺถารา ปริสา โหติ. ตตฺถ เอกปุริโสปิ ฉินฺนภินฺนสรีโร วา กิลิฏฺฐวตฺโถ วา นตฺถิ. สุจิปริวาโร หิ ราชา จกฺกวตฺติ. จกฺกวตฺติปริสา นาม วิชฺชาธรปริสา ๗- วิย อากาเส คจฺฉมานา อินฺทนีลมณิตเล วิปฺปกิณฺณรตนสทิสา โหติ. เตน วุตฺตํ "อนฺวเทว ราชา จกฺกวตฺตี สทฺธึ จตุรงฺคินิยา เสนายา"ติ.

@๔ ม. วิวิธสํหาร... ๕ ม. กายาลงฺกาเรน ๖ ฉ.ม. จกฺกรตนํ นิพฺพตฺตํ

@๗ วิชฺชาธรปุริสา, สุ.วิ. ๒/๒๔๔/๒๓๐