3. Mahākaccānabhaddekarattasuttavaṇṇanā

[279] Evamme sutanti mahākaccānabhaddekarattasuttaṃ. Tattha tapodārāmeti tapodassa tattodakassa rahadassa vasena evaṃladdhanāme ārāme. Vebhārapabbatassa kira heṭṭhā bhūmaṭṭhakanāgānaṃ pañcayojanasatikaṃ nāgabhavanaṃ devalokasadisaṃ maṇimayena talena ārāmauyyānehi ca samannāgataṃ, tattha nāgānaṃ

Kasmā pana sā edisā jātā? rājagahaṃ kira parivāretvā mahāpetaloko, tattha dvinnaṃ mahālohakumbhinirayānaṃ antare ayaṃ tapodā āgacchati, tasmā sā kuthitā sandati. Vuttamapi cetaṃ "yatāyaṃ bhikkhave tapodā sandati, so daho acchodako sītodako sātodako setodako suppatittho ramaṇīyo pahūtamacchakacchapo, cakkamattāni ca padumāni pupphanti. Apicāyaṃ bhikkhave tapodā dvinnaṃ mahānirayānaṃ antarikāya āgacchati, tenāyaṃ tapodā kuthitā sandatī"ti. Imassa pana ārāmassa abhisammukhaṭṭhāne tato mahāudakarahado jāto, tassa nāmavasenāyaṃ vihāro tapodārāmoti vuccati.

[280] Samiddhīti tassa kira therassa attabhāvo samiddho abhirūpo pāsādiko, tasmā samiddhitveva saṅkhaṃ gato. Ādibrahmacariyakoti maggabrahmacariyassa ādi pubbabhāga paṭipattibhūto. Idaṃ vatvāna sugato uṭṭhāyāsanātiādi madhupiṇḍikasutte vuttanayeneva vitthāretabbaṃ.