6. Chachakkasuttavaṇṇanā

[420] Evamme sutanti chachakkasuttaṃ. Tattha ādikalyāṇanti ādimhi kalyāṇaṃ bhaddakaṃ niddosaṃ katvā desessāmi. Majjhapariyosānesupi eseva nayo. Iti bhagavā ariyavaṃsaṃ navahi, mahāsatipaṭṭhānaṃ sattahi, mahāassapuraṃ sattahi padehi thomesi, imaṃ pana suttaṃ navahi padehi thomesi.

Veditabbānīti saha vipassanāmaggena jānitabbāni. Manāyatanena tebhūmakacittameva kathitaṃ, dhammāyatanena bahiddhā tebhūmakadhammā ca, manoviññāṇeneva ṭhapetvā dvipañcaviññāṇāni sesaṃ bāvīsatividhaṃ lokiyavipākacittaṃ. Phassavedanā yathāvuttavipākaviññāṇasampayuttāva. Taṇhāti vipākavedanāpaccayā javanakkhaṇe uppannataṇhā.

[422] Cakkhu attāti pāṭiyekko anusandhi. Heṭṭhā kathitānaṃ hi dvinnaṃ saccānaṃ anattabhāvadassanatthaṃ ayaṃ desanā āraddhā. Tatta na upapajjatīti na yujjati. Vetīti vigacchati nirujjhati.