10. Saṅkhārūpapattisuttavaṇṇanā

[160] Evamme sutanti saṅkhārūpapattisuttaṃ. Tattha saṅkhārūpapattinti saṅkhārānaṃyeva upapattiṃ, na sattassa, na posassa, puññābhisaṅkhārena vā bhavūpagakkhandhānaṃ upapattiṃ.

[161] Saddhāya samannāgatoti saddhādayo pañca dhammā lokikā dahatīti ṭhapeti. Adhiṭṭhātīti patiṭaṭhāpeti. Saṅkhārā ca vihārā cāti saha patthanāya saddhādayova pañca dhammā. Tatrūpapattiyāti tasmiṃ ṭhāne nibbattanatthāya. Ayaṃ maggo ayaṃ paṭipadāti saha patthanāya pañca dhammāva. Yassa hi pañca dhammā atthi, na patthanā, tassa gati anibaddhā. Yassa patthanā atthi, na pañca dhammā, tassapi anibaddhā ca. Yesaṃ ubhayamatthi, tesaṃ gati nibaddhā. Yathā hi ākāse khittadaṇḍo aggena vā majjhena vā mūlena vā nipatissatīti niyamo natthi, evaṃ sattānaṃ paṭisandhigahaṇaṃ aniyataṃ. Tasmā kusalakammaṃ katvā ekasmiṃ ṭhāne patthanaṃ kātuṃ vaṭṭati.

[165] Āmaṇḍanti āmalakaṃ. Yathā taṃ parisuddhacakkhussa purisassa sabbasova pākaṭaṃ hoti, evaṃ tassa brahmuno saddhiṃ tattha nibbattasattehi sahassīlokadhātu. Esa nayo sabbattha.