Kiṃ pana te antogabbhaṃ pavisitvā ṭhitā cattāro mahārājāno bodhisattamātuyā attānaṃ dassenti na dassentīti. Nhānamaṇḍanabhojanādi- sarīrakiccakāle na dassenti, sirīgabbhaṃ pavisitvā varasayane nipannakāle pana dassenti. Tattha kiñcāpi amanussānaṃ rūpaṃ nāma manussānaṃ sappaṭibhayaṃ hoti. Bodhisattamātā pana attano ceva puttassa ca puññānubhāvena te disvā na bhāyati. Pakatiantepurapālakesu viyassā tesu cittaṃ uppajjati.

[203] Pakatiyā sīlavatīti sabhāveneva sīlasampannā. Anuppanne kira buddhe manussā tāpasaparibbājakānaṃ santike vanditvā ukkuṭikaṃ nisīditvā sīlaṃ gaṇhanti, bodhisattamātāpi kāladevilassa isino santike gaṇhāti. Bodhisatte pana kucchigate aññassa pādamūle nisīdituṃ nāma na sakkā, samāsane nisīditvā gahitasīlampi avaññā kāraṇamattaṃ hoti. Tasmā sayameva sīlaṃ aggahesīti vuttaṃ hoti.

Purisesūti bodhisattassa pitaraṃ ādiṃ katvā kesuci manussesu purisādhippāyacittaṃ nuppajjati. Tañca kho bodhisattagāravena, na pahīnakilesatāya. Bodhisattamātu rūpaṃ pana sukusalāpi sippikā potthakammādīsupi kātuṃ na sakkonti, taṃ disvā purisassa rāgo nuppajjatīti na sakkā vuttaṃ. Sace pana naṃ rattacitto upasaṅkamitukāmo hoti, pādā na vahanti. Dibbasaṅkhalikāya bajjhanti. Tasmā "anatikkamanīyā"tiādi vuttaṃ.