[38] Atha catutthavāre vivādo kasmā? saññāya vivādo. "ahaṃ satiṃyeva satipaṭṭhānaṃ vadāmi, ayaṃ `kāyo satipaṭṭhānan'ti vadatī"ti hi nesaṃ saññā hoti. Byañjanepi eseva nayo.

[39] Na codanāya coditabbanti na codanatthāya codāyitabbaṃ. Ekacco hi puggalo "nalāṭe te sāsapamattā piḷakā"ti vutto "mayhaṃ nalāṭe sāsapamattaṃ piḷakaṃ passasi, attano nalāṭe tālapakkamattaṃ mahāgaṇḍaṃ na passasī"ti vadati. Tasmā puggalo upaparikkhitabbo. Adaḷhadiṭṭhīti anādānadiṭṭhī suṃsumāraṃ hadaye pakkhipanto viya daḷhaṃ na taṇhāti.

Upaghātoti caṇḍabhāvena vaṇaghaṭṭitassa viya dukkhuppatti. Supaṭinissaggīti "kiṃ nāmāhaṃ āpanno, kadā āpanno"ti vā "tuvaṃ āpanno, tava upajjhāyo āpanno"ti vā ekaṃ dve vāre vatvāpi "asukaṃ nāma asukadivase nāma bhante āpannattha, saṇikaṃ anussarathā"ti saritvā tāvadeva vissajjissati. Videsāti bahuṃ atthañca kāraṇañca āharantassa kāyacittakilamatho. Sakkomīti evarūpo hi puggalo okāsaṃ kāretvā "āpattiṃ āpannattha bhante"ti vutto "kadā kismiṃ vatthusmin"ti vatvā "asukadivase asukasmiṃ vatthusmin"ti vutte "na sarāmi āvuso"ti vadati, tato "saṇikaṃ bhante sarathā"ti bahuṃ vatvā sārito saritvā vissajjeti. Tenāha "sakkomī"ti. Iminā nayena sabbattha attho veditabbo.