Aniccatanti aniccākāraṃ. Vipariṇāmavirāganirodhanti pakativijahanena vipariṇāmaṃ vigacchanena virāgaṃ nirujjhanena nirodhaṃ. Sammappaññāyāti vipassanāpaññāya. Idaṃ vuccati nekkhammasitasomanassanti idaṃ rañño viya attano sirisampattiṃ olokentassa vipassanaṃ paṭṭhapetvā nisinnassa saṅkhārānaṃ bhedaṃ passato saṅkhāragatamhi tikkhe sūre vipassanāñāṇe vahante uppannaṃ somanassaṃ "nekkhammasitaṃ somanassan"ti vuccati. Vuttampi cetaṃ:-

"suññāgāraṃ paviṭṭhassa santacittassa bhikkhuno

amānusī ratī hoti sammā dhammaṃ vipassato.

Yato yato sammasati khandhānaṃ udayabbayaṃ