[3] Gāḷhupalepanenāti bahalūpalepanena, punappunaṃ visarañjitena, na pana khaliyā littena viya. Esaniyāti esanisalākāya antamaso antakavaṭṭiyāpi. Eseyyāti gambhīraṃ vā uttānaṃ vāti vīmaṃseyya. Agadaṅgāranti jhāmaharitakassa vā āmalakassa vā cuṇṇaṃ. Odadeyyāti pakkhipeyya. Arogotiādi māgaṇḍiyasutte vuttameva.

Evameva khoti ettha idaṃ opammasaṃsandanaṃ, sallena viddhassa hi viddhakāle vedanāya pākaṭakālo viya imesaṃ "mayaṃ pubbe ahumhā vā no vā, pāpakammaṃ akarimhā vā no vā, evarūpaṃ vā pāpaṃ akarimhā"ti jānanakālo siyā. Vaṇamukhassa parikantanādīsu catūsu kālesu vedanāya pākaṭakālo viya "ettakaṃ vā no dukkhaṃ nijjiṇṇaṃ, ettake vā dukkhe nijjiṇṇe sabbameva dukkhaṃ nijjiṇṇaṃ bhavissati, suddhante patiṭṭhitā nāma bhavissāmā"ti jānanakālo siyā. Aparabhāge phāsukabhāvajānanakālo viya diṭṭheva dhamme akusalānaṃ dhammānaṃ pahānāya kusalānaṃ dhammānaṃ upasampadāya ca jānanakālo siyā. Evamettha ekāya upamāya tayo atthā, catūhi upamāhi eko attho paridīpito.

[4] Ime pana tato ekampi na jānanti, virajjhitvā gate salle aviddhopi "viddhosi mayā"ti paccatthikassa vacanappamāṇeneva "viddhosmī"ti saññaṃ uppādetvā dukkhappattapuriso viya kevalaṃ mahāniganthassa vacanappamāṇena sabbametaṃ saddahantā evamāgantukasallūpamāya bhagavatā niggahitā paccāharituṃ asakkontā yathā nāma dubbalo sunakho migaṃ uṭṭhāpetvā sāmikassa abhimukhaṃ karitvā attanā osakkati, evaṃ mahāniganthassa matthake vādaṃ pakkhipantā nigantho āvusotiādimāhaṃsu.