Na tvevāhaṃ ānanda kenaci pariyāyena saṃghagatāya dakkhiṇāyāti ettha atthi buddhappamukho saṃgho, atthi etarahi saṃgho, atthi anāgate kāsāvakaṇṭhasaṃgho. Buddhappamukhasaṃgho etarahi saṃghena saddhiṃ na upanetabbo, etarahi saṃgho anāgate kāsāvakaṇṭhasaṃghena saddhiṃ na upanetabbo. Tena teneva samayena kathetabbaṃ. Saṃghato uddisitvā gahitasamaṇaputhujjano hi pāṭipuggaliko sotāpanno, saṃgho cittīkāraṃ kātuṃ sakkontassa puthujjanasamaṇe dinnaṃ mahapphalataraṃ. Uddisitvā gahito sotāpanno pāṭipuggaliko sakadāgāmītiādīsupi eseva nayo. Saṃghe cittīkāraṃ kātuṃ sakkontassa hi khīṇāsave dinnadānato uddisitvā gahite dussīlepi dinnaṃ mahapphalatarameva. Yaṃ pana vuttaṃ "sīlavato kho mahārāja dinnaṃ mahapphalaṃ, no tathā dussīle"ti, taṃ imaṃ nayaṃ pahāya "catasso kho imānanda dakkhiṇāvisuddhiyo"ti imasmiṃ catukke daṭṭhabbaṃ.

[381] Dāyakato visujjhatīti mahapphalabhāvena visujjhati, mahapphalā hotīti attho. Kalyāṇadhammoti sucidhammo, na pāpadhammoti dāyakato visujjhatīti cettha vessantaramahārājā kathetabbo. So hi jūjakabrāhmaṇassa dārake datvā paṭhaviṃ kampesi.

Paṭiggāhakato visujjhatīti ettha kalyāṇīnadīmukhadvāravāsī kevaṭṭo kathetabbo. So kira dīghasomattherassa tikkhattuṃ piṇḍapātaṃ datvā maraṇamañce nipanno "ayyassa maṃ dīghasomattherassa dinnapiṇḍapāto uddharatī"ti āha.

Neva dāyakatoti ettha vaḍḍhamānavāsī luddako kathetabbo. So kira petadakkhiṇaṃ dento ekassa dussīlasseva tayo vāre adāsi, tatiyavāre "amanusso dussīlo maṃ vilumpatī"ti viravi, ekassa sīlavantassa bhikkhuno datvā pāpitakāleyevassa pāpuṇi.