[63] Ṭhānaṃ kho panetanti pāṭiyekko anusandhi. Heṭṭhā hi samāpattilābhino adhimānikassāpi khīṇāsavassāpi nighaṃso kathito, sukkhavipassakassa pana adhimānikassāpi khīṇāsavassāpi na kathito. Tesaṃ dvinnampi nighaṃsaṃ dassetuṃ imaṃ desanaṃ ārabhi. Taṃ pana paṭikkhittaṃ. Samāpattilābhino hi adhimānikassa nighaṃse kathite sukkhavipassakassāpi adhimānikassa kathitova hoti, samāpattilābhino ca khīṇāsavassa kathite sukkhavipassakassa khīṇāsavassāpi kathitova hoti. Etesaṃ pana dvinnaṃ bhikkhūnaṃ sappāyāsappāyaṃ kathetuṃ imaṃ desanaṃ ārabhi.

Tattha siyā:- puthujjanassa tāva ārammaṇaṃ asappāyaṃ hotu, khīṇāsavassa kathaṃ asappāyanti. Yadaggena puthujjanassa asappāyaṃ, tadaggena khīṇāsavassāpi asappāyameva. Visaṃ nāma jānitvā khāditampi ajānitvā khāditampi visameva. Na hi khīṇāsavenapi "ahaṃ khīṇāsavo"ti asaṃvutena bhavitabbaṃ. Khīṇāsavenapi yuttappaṭiyutteneva bhavituṃ vaṭṭati.

[64] Tattha samaṇenāti buddhasamaṇena. Chandarāgabyāpādenāti so avijjāsaṅkhāto visadoso chandarāgena ca byāpādena ca ruppati kuppati. Asappāyānīti avaḍḍhikarāni ārammaṇāni. Anuddhaṃseyyāti soseyya milāpeyya. Saupādisesanti sagahaṇasesaṃ, upāditabbaṃ gaṇhitabbaṃ idha upādīti vuttaṃ. Analaṃ ca te antarāyāyāti jīvitantarāyaṃ te kātuṃ asamatthaṃ. Rajosūkanti rajo ca vīhisukādi ca sūkaṃ. Asucivisadosoti so ca visadoso. Tadubhayenāti yā sā asappāyakiriyā yo ca visadoso, tena ubhayena. Puthuttanti mahantabhāvaṃ.