๕. ทุติยมารปาสสุตฺตวณฺณนา

[๑๔๑] ปญฺจเม มุตฺตาหนฺติ มุตฺโต อหํ. ปุริมสุตฺตํ อนฺโตวสฺเส วุตฺตํ, อิทํ ปน ปวาเรตฺวา วุฏฺฐวสฺสกาเล. จาริกนฺติ อนุปุพฺพคมนจาริกํ. ทิวสํ ๕- โยชนปรมํ คจฺฉนฺตา จรถาติ วทติ. มา เอเกน เทฺวติ เอกมคฺเคน เทฺว ชนา มา อคมิตฺถ. เอวํ หิ คเตสุ เอกสฺมึ ธมฺเม เทเสนฺเต เอเกน ตุณฺหีภูเตน ฐาตพฺพํ โหติ. ตสฺมา เอวมาห.

อาทิกลฺยาณนฺติ อาทิมฺหิ กลฺยาณํ สุนฺทรํ ภทฺทกํ. ตถา มชฺฌปริโยสาเนสุ อาทิมชฺฌปริโยสานํ จ นาเมตํ สาสนสฺส จ เทสนาย จ วเสน ทุพฺพิธํ. ตตฺถ สาสนสฺส สีลํ อาทิ, สมถวิปสฺสนามคฺคา มชฺฌํ, ผลนิพฺพานานิ