๓. โคธิกสุตฺตวณฺณนา

[๑๕๙] ตติเย อิสิคิลิปสฺเสติ อิสิคิลิสฺส นาม ปพฺพตสฺส ปสฺเส. กาฬสิลายาติ กาฬวณฺณาย สิลาย. สามายิกํ เจโตวิมุตฺตินฺติ อปฺปิตกฺขเณ ๖- ปจฺจนีกธมฺเมหิ วิมุจฺจติ, อารมฺมเณ จ อธิมุจฺจตีติ โลกิยสมาปตฺติ สามายิกา เจโตวิมุตฺติ นาม. ผุสีติ ปฏิลภิ. ปริหายีติ กสฺมา ยาว ฉฏฺฐํ ปริหายิ? สาพาธตฺตา. เถรสฺส กิร วาตปิตฺตเสมฺหวเสน อนุสายิโก อาพาโธ อตฺถิ, เตน สมาธิสฺส สปฺปาเย อุปการธมฺเม ปูเรตุํ น สกฺโกติ, อปฺปิตอปฺปิตาย สมาปตฺติยา ปริหายติ.

ยนฺนูนาหํ สตฺถํ อาหเรยฺยนฺติ โส กิร จินฺเตสิ, ยสฺมา ปริหีนชฺฌานสฺส กาลํ กโรโต อนิพทฺธา คติ โหติ, อปริหีนชฺฌานสฺส นิพทฺธา คติ โหติ, พฺรหฺมโลเก นิพฺพตฺตติ, ตสฺมา สตฺถํ อาหริตุกาโม อโหสิ. อุปสงฺกมีติ "อยํ สมโณ สตฺถํ อาหริตุกาโม, สตฺถาหรณํ จ นาเมตํ กาเย จ ชีวิเต จ อนเปกฺขสฺส โหติ, โย เอวํ กาเย จ ชีวเต จ อนเปกฺโข โหติ, โส มูลกมฺมฏฺฐานํ สมฺมสิตฺวา อรหตฺตมฺปิ คเหตุํ สมตฺโถ โหติ, มยา ปน