๔. อรุณวตีสุตฺตวณฺณนา

[๑๘๕] จตุตฺเถ อภิภูสมฺภวนฺติ อภิภู จ สมฺภโว จ. เตสุ อภิภูเถโร สาริปุตฺตตฺเถโร วิย ปญฺญาย อคฺโค, สมฺภวตฺเถโร มหาโมคฺคลฺลาโน วิย สมาธินา อคฺโค. อุชฺฌายนฺตีติ อวชฺฌายนฺติ, ลามกโต วา จินฺเตนฺติ. ขิยฺยนฺตีติ กินฺนาเมตํ กินฺนาเมตนฺติ อญฺญมญฺญํ กเถนฺติ. วิปาเจนฺตีติ วิตฺถารยนฺติ ๒- ปุนปฺปุนํ กเถนฺติ. เหฏฺฐิเมน อุปฑฺฒกาเยนาติ นาภิโต ปฏฺฐาย เหฏฺฐิมกาเยน. ปาลิยํ เอตฺตกเมว อาคตํ. เถโร ปน "ปกติวณฺณํ วิชหิตฺวา นาควณฺณํ คเหตฺวา ทสฺเสติ, สุปณฺณวณฺณํ คเหตฺวา วา ทสฺเสตี"ติอาทินา ๓- นเยน อาคตํ อเนกปฺปการํ อิทฺธิวิกุพฺพนํ ทสฺเสสิ. อิมา คาถาโย อภาสีติ เถโร กิร จินฺเตสิ "กถํ เทสิตา นุ โข ธมฺมเทสนา สพฺเพสํ ปิยา อสฺส มนาปา"ติ. ตโต อาวชฺเชนฺโต "สพฺเพปิ ปาสณฺฑา สพฺเพ เทวมนุสฺสา อตฺตโน อตฺตโน สมเย ปุริสการํ วณฺณยิสฺสนฺติ, ๔- วิริยสฺส อวณฺณวาที นาม นตฺถิ, วิริยปฏิสํยุตฺตํ กตฺวา เทเสสฺสามิ, เอวมยํ ธมฺมเทสนา สพฺเพสํ ปิยา ภวิสฺสติ มนาปา"ติ ญตฺวา ตีสุ ปิฏเกสุ วิจินิตฺวา อิมา คาถา อภาสิ.

@๓ ขุ. ปฏิ. ๓๑/๖๘๖/๕๙๖ อิทฺธิกถา ๔ ฉ.ม., อิ. วณฺณยนฺติ