๑๑. สกฺกสํยุตฺต

๑. ปฐมวคฺค

๑. สุวีรสุตฺตวณฺณนา

[๒๔๗] สกฺกสํยุตฺตสฺส ปฐเม อภิยํสูติ กทา อภิยํสุ ๑- ? ยทา พลวนฺโต อเหสุํ, ตทา ตตฺรายํ อนุปุพฺพีกถา:- สกฺโก กิร มคธรฏฺเฐ อจลคามเก ๒- มโฆ นาม มาณโว หุตฺวา เตตฺตึส ปุริเส คเหตฺวา กลฺยาณกมฺมํ กโรนฺโต สตฺต วตฺตปทานิ ปูเรตฺวา ตตฺถ กาลกโต เทวโลเก นิพฺพตฺติ. ตํ พลวกมฺมานุภาเวน สปริสํ เสสเทวตา ทสหิ ฐาเนหิ อธิคณฺหนฺตํ ทิสฺวา "อาคนฺตุกเทวปุตฺตา อาคตา"ติ เนวาสิกา คนฺธปานํ ๓- สชฺชยึสุ. สกฺโก สกปริสาย สญฺญํ อทาสิ "มาริสา มา คนฺธปานํ ปิวิตฺถ, ปิวนาการมตฺตเมว ทสฺเสถา"ติ. เต ตถา อกํสุ. เนวาสิกเทวปุตฺตา ๔- สุวณฺณสรเกหิ อุปนีตํ คนฺธปานํ ยาวทตฺถํ ปิวิตฺวา มตฺตา ตตฺถ ตตฺถ สุวณฺณปฐวิยํ ปติตฺวา สยึสุ. สกฺโก "คณฺหถ ปุตฺตมตาย ปุตฺเต"ติ ๕- เต ปาเทสุ คเหตฺวา สิเนรุปาเท ขิปาเปสิ. สกฺกสฺส ปุญฺญเตเชน ตทนุวตฺตกาปิ สพฺเพ ตตฺเถว ปตึสุ. เต สิเนรุเวมชฺฌกาเล สญฺญํ ลภิตฺวา "ตาตา น สุรํ ปิวิมฺหา"ติ ๖- อาหํสุ. ตโต ปฏฺฐาย อสุรา นาม ชาตา. อถ เนสํ กมฺมปจฺจยอุตุสมุฏฺฐานํ สิเนรุสฺส เหฏฺฐิมตเล ทสโยชนสหสฺสมตฺตํ ๗- อสุรภวนํ นิพฺพตฺติ. สกฺโก เตสํ นิวตฺติตฺวา ๘- อนาคมนตฺถาย อารกฺขํ ฐเปสิ, ยํ สนฺธาย วุตฺตํ:-