๗. อิสฺสริยสุตฺตวณฺณนา

[๗๗] สตฺตเม สตฺถมลนฺติ มลคฺคหิตสตฺถํ. กึสุ หรนฺตํ วาเรนฺตีติ ตํ ๑- หรนฺตํ นิเสเธนฺติ. วโสติ อาณาปวตฺตนํ. อิตฺถีติ อวิสฺสชฺชนียภณฺฑตฺตา "อิตฺถี ภณฺฑานมุตฺตมํ, วรภณฺฑนฺ"ติ อาห. อถวา สพฺเพปิ โพธิสตฺตา จ จกฺกวตฺติโน จ มาตุกุจฺฉิยํเยว นิพฺพตฺตนฺตีติ "อิตฺถี ภณฺฑานมุตฺตมนฺ"ติ อาห. โกโธ สตฺถมลนฺติ โกโธ มลคฺคหิตสตฺถสทิโส, ปญฺญาสตฺถสฺส วา มลนฺติ สตฺถมลํ. อพฺพุทนฺติ วินาสการณํ, โจรา โลกสฺมึ วินาสกาติ อตฺโถ. หรนฺโตติ สลากภตฺตาทีนิ คเหตฺวา คจฺฉนฺโต. สลากภตฺตาทีนิ หิ ปฏฺฐาปิตกาเลเยว ๒- มนุสฺเสหิ ปริจฺจตฺตานิ. เตสํ ตานิ หรนฺโต สมโณ ปิโย โหติ, อหรนฺเต ๓- ปุญฺญหานึ นิสฺสาย วิปฺปฏิสาริโน โหนฺติ. สตฺตมํ.