เอวํ ปาปปุคฺคเลปิ ครหติ, สมเณน นาม ราควสิเกน โทสโมหวสิเกน น โหตพฺพํ, อุปฺปนฺโน ราโค โทโส โมโห ปหาตพฺโพ"ติ เอวํ ปาปธมฺเมปิ ครหตีติ ทฺวีหิ การเณหิ "ปาปครหี ภนฺเต อายสฺมา สาริปุตฺโต"ติ วทติ.

เอวํ อายสฺมตา อานนฺเทน โสฬสหิ ปเทหิ เถรสฺส ยถาภูตํ วณฺณปฺปกาสเน กเต "กึ อานนฺโท อตฺตโน ปิยสหายสฺส วณฺณํ กเถตุํ น ลภติ, กเถตุ กึ ปน เตน กถิตํ ตเถว โหติ, กึ โส สพฺพญฺญู"ติ โกจิ ปาปปุคฺคโล วตฺตุํ มา ลภีติ. ๔- สตฺถา ตํ วณฺณภณนํ อกุปฺปํ สพฺพญฺญูภาสิตํ กโรนฺโต ชินมุทฺทิกาย ลญฺฉนฺโต เอวเมตนฺติอาทิมาห.

เอวํ ตถาคเตน จ อานนฺทตฺเถเรน จ มหาสาวกสฺส ๕- วณฺเณ กถิยมาเน ภูมฏฺฐกา เทวตา อุฏฺฐหิตฺวา เอเตเหว โสฬสหิ ปเทหิ วณฺณํ กถยึสุ, ตโต อากาสฏฺฐกเทวตา สีตพลาหกา อุณฺหพลาหกา จาตุมฺมหาราชิกาติ ยาว อกนิฏฺฐพฺรหฺมโลกา เทวตา อุฏฺฐหิตฺวา เอเตเหว โสฬสหิ ปเทหิ วณฺณํ กถยึสุ. เอเตนุปาเยน เอกจกฺกวาฬํ อาทึ กตฺวา ทสสุ จกฺกวาฬสหสฺเสสุ เทวตา อุฏฺฐหิตฺวา กถยึสุ. อถายสฺมโต สาริปุตฺตสฺส สทฺธิวิหาริโก สุสิโม เทวปุตฺโต จินฺเตสิ "อิเม เทวปุตฺตา ๖- อตฺตโน อตฺตโน นกฺขตฺตกีฬํ ปหาย ตตฺถ ฐตฺวา ๗- มยฺหํ อุปชฺฌายสฺเสว วณฺณํ กเถนฺติ, คจฺฉามิ ตถาคตสฺส สนฺติกํ, คนฺตฺวา เอตเทว วณฺณภณนํ เทวตา ภาสิตํ กโรมี"ติ, โส ตถา อกาสิ. ตํ ทสฺเสตุํ อถโข สุสิโม เทวปุตฺโตติ ๘- อาทิ วุตฺตํ.