เตปิ มยาติ กปฺปโกลาหลํ พุทฺธโกลาหลํ จกฺกวตฺติโกลาหลนฺติ ตีณิ โกลาหลานิ. ตตฺถ "วสฺสสตสหสฺสมตฺถเก กปฺปุฏฺฐานํ ภวิสฺสตี"ติ กปฺปโกลาหลํ นาม โหติ, "อิโต วสฺสสตสหสฺสมตฺถเก โลโก วินสฺสิสฺสติ, เมตฺตํ มาริสา ภาเวถ, กรุณํ มุทิตํ อุเปกฺขนฺ"ติ มนุสฺสปเถ เทวตา โฆเสนฺติโย วิจรนฺติ. "วสฺสสหสฺสมตฺถเก ปน พุทฺโธ อุปฺปชฺชิสฺสตี"ติ พุทฺธโกลาหลํ นาม โหติ, "อิโต วสฺสสหสฺสมตฺถเก พุทฺโธ อุปฺปชฺชิตฺวา ธมฺมานุธมฺมปฏิปทํ ปฏิปนฺเนน สํฆรตเนน ปริวาริโต ธมฺมํ เทเสนฺโต วิจริสฺสตี"ติ เทวตา อุคฺโฆเสนฺติ. "วสฺสสตมตฺถเก ปน จกฺกวตฺติ อุปฺปชฺชิสฺสตี"ติ จกฺกวตฺติโกลาหลํ นาม โหติ, "อิโต วสฺสสตมตฺถเก สตฺตรตนสมฺปนฺโน จาตุทฺทีปิสฺสโร ปโรสหสฺสปุตฺตปริวาโร ๒- เวหาสงฺคโม จกฺกวตฺติราชา อุปฺปชฺชิสฺสตี"ติ เทวตา อุคฺโฆเสนฺติ.
อิเมสุ ตีสุ โกลาหเลสุ อิเม ฉ สตฺถาโร พุทฺธโกลาหลํ สุตฺวา อาจริเย ปยิรุปาสิตฺวา จินฺตามณิวิชฺชาทีนิ อุคฺคณฺหิตฺวา "มยํ พุทฺธมฺหา"ติ ปฏิญฺญํ กตฺวา มหาชนปริวุตา ชนปทํ วิจรนฺตา อนุปุพฺเพน สาวตฺถิยํ สมฺปตฺตา. เตสํ อุปฏฺฐากา ราชานํ อุปสงฺกมิตฺวา "มหาราช ปูรณกสฺสโป ฯเปฯ อชิโต เกสกมฺพโล พุทฺโธ กิร สพฺพญฺญู"ติ ๓- อาโรเจสุํ. ราชา "ตุเมฺหว เน นิมนฺเตตฺวา อาเนถา"ติ อาห.
@๓ ฉ.ม. พุทฺโธ กิร สพฺพญฺญู กิรา"ติ เต คนฺตฺวา เตหิ "ราชา โว นิมนฺเตติ, รญฺโญ เคเห ภิกฺขํ คณฺหถา"ติ วุตฺตา คนฺตุํ น อุสฺสหนฺติ, ๑- ปุนปฺปุนํ วุจฺจมานา อุปฏฺฐากานํ จิตฺตานุรกฺขนตฺถาย อธิวาเสตฺวา สพฺเพ เอกโตว อคมํสุ. ราชา อาสนานิ ปญฺญาเปตฺวา "นิสีทนฺตุ"ติ อาห. นิคณฺฐานํ ๒- อตฺตภาเว ราชุสมา ๓- นาม ผรติ, เต มหารเหสุ อาสเนสุ นิสีทิตุํ อสกฺโกนฺตา ผลเกสุ เจว ภูมิยญฺจ นิสีทึสุ.