โส สิวิกสาลายํ พฺราหฺมเณ สนฺนิปาเตตฺวา ตมตฺถํ อาโรเจตฺวา "วิสุํ วิสุํ คนฺตฺวา เอวํ วทถา"ติ ตโย วคฺเค อกาสิ. พฺราหฺมณา ปวิสิตฺวา ราชานํ สุขเสยฺยํ ปุจฺฉึสุ. ราชา ปุโรหิตสฺส กถิตนิยาเมเนว กเถตฺวา "กถํ โสตฺถิ ภเวยฺยา"ติ ปุจฺฉิ. มหาพฺราหฺมณา "สพฺพปญฺจปญฺจสตํ ๓- ยญฺญํ ยชิตฺวา เอตสฺส กมฺมสฺส โสตฺถิ ภเวยฺย, เอวํ มหาราช อาจริยา กเถนฺตี"ติ อาหํสุ. ราชา เตสํ สุตฺวา อนภินนฺทิตฺวา อปฏิกฺโกสิตฺวา ตุณฺหี อโหสิ. อถ ทุติยวคฺคพฺราหฺมณาปิ อาคนฺตฺวา ตเถว กเถสุํ. ตถา ตติยวคฺคพฺราหฺมณาปิ. อถ ราชา "ยญฺญํ กโรนฺตู"ติ อาณาเปสิ. ตโต ปฏฺฐาย พฺราหฺมณา อุสภาทโย ปาเณ อาหราเปสุํ, นคเร มหาสทฺโท อุทปาทิ. ตํ ปวตฺตึ ญตฺวา มลฺลิกา ราชานํ ตถาคตสฺส สนฺติกํ เปเสสิ. โส คนฺตฺวา ภควนฺตํ วนฺทิตฺวา เอกมนฺตํ นิสีทิ. อถ นํ ภควา "หนฺท กุโต นุ ตฺวํ มหาราช อาคจฺฉสิ ทิวาทิวสฺสา"ติ อาห. ราชา "อชฺช เม ภนฺเต สุปินเก ๔- จตฺตาโร สทฺทา สุตา, โสหํ พฺราหฺมเณ ปุจฺฉึ, พฺราหฺมณา `ภาริโก ๕- มหาราช สุปิโน, สพฺพปญฺจปญฺจสตํ ๓- ยญฺญํ ยชิตฺวา ปฏิกมฺมํ กโรมา'ติ อารทฺธา"ติ อาห. กินฺติ เต มหาราช สทฺทา สุตาติ. โส ยถาสุตํ อาโรเจสิ. อถ นํ ภควา อาห:- ปุพฺเพ มหาราช อิมสฺมึเยว นคเร จตฺตาโร เสฏฺฐิปุตฺตา ปรทารกา ๖- หุตฺวา นนฺโทปนนฺทาย โลหกุมฺภิยา นิพฺพตฺตา สฏฺฐีวสฺสสหสฺสมตฺถเก อุมฺมุชฺชึสุ. ๗-

@๔ ม. สุปินกา ๕ ฉ.ม., อิ. ภาริโย ๖ ฉ.ม., อิ. ปรทาริกา

@๗ ฉ.ม., อิ. อุคฺคจฺฉึสุ, ม. อุปฺปชฺชึสุ