น ขฺวาหนฺติ น โข อหํ. กสฺมา ปเนวมาหาติ? ตสฺมึ กิร โภชเน อุปหฏมตฺเตเยว "สตฺถา ภุญฺชิสฺสตี"ติ สญฺญาย จตูสุ มหาทีเปสุ ทฺวีสุ จ ๔- ปริตฺตทีปสหสฺเสสุ เทวตา ปุปฺผผลาทีนิ เจว สปฺปินวนีตเตลมธุผาณิตาทีนิ จ อาทาย มธุปฏลํ ปีเฬตฺวา มธุํ คณฺหนฺติโย วิย ทิพฺพานุภาเวน นิพฺพตฺติโตชเมว คเหตฺวา ปกฺขิปึสุ. เตน ตํ สุขุมตฺตํ คตํ, มนุสฺสานญฺจ โอฬาริกวตฺถุนฺติ ๕- เตสํ ตาว โอฬาริกวตฺถุตาย สมฺมา ปริณามํ น คจฺฉติ. โคยูเส ปน ตีณิ พีชานิ ๖- ปกฺขิปิตฺวา ปกฺกตฺตา โอฬาริกมิสฺสกํ ชาตํ, เทวานญฺจ สุขุมวตฺถุนฺติ เตสํ สุขุมวตฺถุตาย สมฺมา ปริณามํ น คจฺฉติ. สุกฺขวิปสฺสกขีณาสวสฺสาปิ กุจฺฉิยํ น ปริณามติ อฏฺฐสมาปตฺติลาภีขีณาสวสฺส ปน สมาปตฺติวเสน ๗- ปริณาเมยฺย. ภควโต ปน ปากติเกเนว กมฺมชเตเชน ปริณาเมยฺย.

@๔ ฉ.ม. จ-สทฺโท น ทิสฺสติ ๕ ฉ.ม....วตฺถูติ, เอวมุปริปิ

@๖ ฉ.ม., อิ ติลพีชานิ ๗ ฉ.ม. สมาปตฺติพเลน