อิทานิ สา ยกฺขินี ปุตฺตสฺส อนุโมทนํ กโรนฺตี สาธุ โข ปณฺฑิโต นามาติอาทิมาห. อชฺชาหมฺหิ สมุคฺคตาติ อหมฺหิ อชฺชโต ๓- อุคฺคตา สมุคฺคตา, สาสเน วา อุคฺคตา สมุคฺคตา, ตฺวํปิ สุขี โหหีติ. ทิฏฺฐานีติ มยา จ ตยา จ ทิฏฺฐานิ. อุตฺตราปิ สุณาตุ เมติ "อมฺหากํ จตุสจฺจปฏิเวธภาวํ ฐิตา อุตฺตราปิ ๔- สุณาตู"ติ วทติ. สห สจฺจปฏิเวเธเนว สาปิ สูจิโลโม วิย สพฺพเสตกณฺฑุกจฺฉุอาทิภาวํ ปหาย ทิพฺพสมฺปตฺตึ ปฏิลภิ ๕- สทฺธึ ปุตฺเตน. ธีตา ปนสฺสา ยถา นาม โลเก มาตาปิตูหิ อิสฺสริเย ลทฺเธ ปุตฺตานํปิ ตํ โหติ, เอวํ มาตุ อานุภาเวเนว สมฺปตฺตึ ลภิ. ตโต ปฏฺฐาย จ สา สทฺธึ ปุตฺตเกหิ คนฺธกุฏิสมีปรุกฺเขเยว นิวาสรุกฺขํ ลภิตฺวา สายํ ปาตํ พุทฺธสฺส ทสฺสนํ ลภมานา ธมฺมํ สุณมานา ทีฆรตฺตํ ตตฺเถว วสิ. สตฺตมํ.