นนฺทนวเนติ เอตฺถ ตํ วนํ ปวิฏฺเฐ ปวิฏฺเฐ นนฺทยติ โตเสตีติ นนฺทนํ. ปญฺจสุ หิ มรณนิมิตฺเตสุ อุปฺปนฺเนสุ "สมฺปตฺตึ ปหาย จวิสฺสามา"ติ ๒- ปริเทวมานา เทวตา สกฺโก เทวานมินฺโท "มา ปริเทวิตฺถ, อภิชฺชนธมฺมา นาม สงฺขารา นตฺถี"ติ โอวทิตฺวา ตตฺถ ปเวสาเปติ. ตาสํ อญฺญาหิ เทวตาหิ พาหาสุ คเหตฺวา ปเวสิตานํปิ ตสฺส สมฺปตฺตึ ทิสฺวาว มรณโสโก วูปสมติ, ปีติปาโมชฺชเมว อุปฺปชฺชติ. อถ ๓- ตสฺมึ กีฬมานาเอว อุณฺหสนฺตตฺโต หิมปิณฺโฑ วิย วิลียนฺติ, วาตาปหตทีปสิขา วิย ปวิชฺฌายนฺตีติ. เอวํ ยงฺกิญฺจิ อนฺโต ปวิฏฺฐํ นนฺทยติ โตเสติเยวาติ นนฺทนํ, ตสฺมึ นนฺทเน. อจฺฉราสงฺฆปริวุตาติ อจฺฉราติ เทวธีตานํ นามมํ, ตาสํ สมูเหน ปริวุตา.

ทิพฺเพหีติ เทวโลเก นิพฺพตฺเตหิ. ปญฺจหิ กามคุเณหีติ มนาปปิยรูปสทฺทคนฺธ- รสโผฏฺฐพฺพสงฺขาเตหิ ปญฺจหิ กามพนฺธเนหิ กามโกฏฺฐาเสหิ วา. สมปฺปิตาติ อุเปตา. อิตรํ ตสฺเสว เววจนํ. ปริจาริยมานาติ รมยมานา, ๔- เตสุ เตสุ วา รูปาทีสุ อินฺทฺริยานิ สญฺจารยมานา. ตายํ เวลายนฺติ ตสฺมึ ปริจารณกาเล. โส ปนสฺส เทวปุตฺตสฺส อธุนาภินิพฺพตฺตกาโล เวทิตพฺโพ. ตสฺส หิ ปฏิสนฺธิกฺขเณเยว รตฺตสุวณฺณกฺขนฺโธ วิย วิโรจยมาโน ติคาวุตปฺมาโณ อตฺตภาโว นิพฺพตฺติ. โส ทิพฺพวตฺถนิวตฺโถ ทิพฺพาลงฺการปฏิมณฺฑิโต ทิพฺพมาลาวิเลปนธโร ทิพฺเพหิ จนฺทนจุณฺเณหิ สมวิกิริยมาโน ๕- ทิพฺเพหิ ปญฺจหิ กามคุเณหิ โอผุโต นิผุโต ๖- ปริโยนทฺโธ โลภาภิภูโต หุตฺวา โลภนิสฺสรณํ นิพฺพานํ อปสฺสนฺโต อาสภึ วาจํ ภาสนฺโต วิย มหาสทฺเทน "น เต สุขํ ปชานนฺตี"ติ อิมํ คาถํ ภาสมาโน ๗- นนฺทนวเน วิจริ. เตน วุตฺตํ "ตายํ เวลายํ อิมํ คาถํ อภาสี"ติ.

@๔ ฉ.ม., อิ. ปริจารยมานาติ รมมานา ๕ สี., อิ. สมฺมาวิกิริยมาโน, ฉ.ม. สมํ