10. Suriyasuttavaṇṇanā

[91] Dasame suriyoti suriyavimānavāsī devaputto. Andhakāreti cakkhuviññāṇupattinivāraṇena andhabhāvakaraṇe. Verocanoti virocano. Maṇḍalīti maṇḍalasaṇṭhāno. Mā rāhu gilī caramantalikkheti antalikkhe caraṃ suriyaṃ rāhu mā gilīti vadati. Kiṃ panesa taṃ gilatīti. Āma gilati. Rāhussa hi attabhāvo mahā, uccattanena aṭṭha yojanasatādhikāni cattāri yojanasahassāni, bāhantaramassa dvādasa yojanasatāni, bahalantena cha yojanasatāni, sīsaṃ navayojanasataṃ, nalātaṃ tiyojanasataṃ, bhamukantaraṃ paññāsayojanaṃ, bhamukaṃ dviyojanasataṃ, mukhaṃ dviyojanasataṃ, ghānaṃ tiyojanasataṃ, mukhādhānaṃ tiyojanasataṃ gambhīraṃ, hatthatalapādatalānaṃ puthutalā dviyojanasatā. Aṅgulipabbāni paṇṇarasa yojanāni. So candasuriye virocamāne disvā issāpakato tesaṃ gamanavīthiṃ otaritvā mukhaṃ vivaritvā tiṭṭhati. Candavimānaṃ suriyavimānaṃ vā tiyojanasatike mahānarake pakkhittaṃ viya hoti. Vimāne adhivatthā devatā maraṇabhayatajjitā ekappahāreneva viravanti. So pana vimānaṃ kadāci hatthenacchādeti, kadāci hanukassa heṭṭhā pakkhipati, kadāci jivhāya parimajjati, kadāci avagaṇḍakārakaṃ bhuñjanto viya kapolantare ṭhapeti. Vegaṃ pana dhāretuṃ na sakkoti. Sace dhāressāmīti gaṇḍakaṃ katvā tiṭṭheyya, matthakaṃ vāssa bhinditvā nikkhameyya, ākaḍḍhitvā naṃ oṇāmeyya. Tasmā vimānena saheva gacchati. Pajaṃ mamāti candimasuriyā kira dvepi devaputtā mahāsamayasuttakathanadivase sotāpattiphalaṃ pattā. Tena bhagavā "pajaṃ mamā"ti āha, putto mama esoti attho. Dasamaṃ.

Paṭhamo vaggo