4. Mārasaṃyutta

1. Paṭhamavagga

1. Tapokammasuttavaṇṇanā

[137] Mārasaṃyuttassa paṭhame uruvelāyaṃ viharatīti paṭividdhasabbaññutañāṇo uruvelagāmaṃ upanissāya viharati. Paṭhamābhisambuddhoti abhisambuddho hutvā paṭhamaṃ antosattasattāhasmiṃyeva. Dukkarakārikāyāti chabbassāni katāya dukkarakiriyāya. Māro pāpimāti attano visayaṃ atikkamituṃ paṭipanne satte māretīti māro. Pāpe niyojeti, sayaṃ vā pāpe niyuttoti pāpimā. Aññānipissa kaṇho adhipati vasavattī antako namuci pamattabandhūtiādīnipi bahūni nāmāni, idha pana nāmadvayameva gahitaṃ. Upasaṅkamīti "ayaṃ samaṇo gotamo `muttosmī'ti maññati, amuttabhāvamassa kathessāmī"ti cintetvā upasaṅkami.