6. Sappasuttavaṇṇanā

[142] Chaṭṭhe soṇḍikā kilañjanti surākārakānaṃ piṭhapattharaṇakilañjaṃ. Kosalikā kaṃsacāṭīti kosalarañño rathacakkappamāṇā paribhogacāṭi. Gaḷagaḷāyanteti gajjente. Kammāragaggariyāti kammāruddhanapanāḷiyā. Dhamamānāyāti bhasmavātena pūriyamānāya. Iti viditvāti "samaṇo gotamo padhānamanuyutto sukhanisinno, ghaṭṭayissāmi nan"ti vuttappakāraṃ attabhāvaṃ māpetvā padhānabhūmiyaṃ ito cito ca sañcarantaṃ vijjulatālokena disvā "ko nukho eso satto"ti āvajjento "māro ayan"ti evaṃ viditvā.

Suññagehānīti suññāgārāni. Seyyāti seyyatthāya, ṭhassāmi caṅkamissāmi nisīdissāmi nipajjissāmīti etadatthāya yo suññāgārāni sevatīti attho. So muni attasaññatoti so buddhamuni hatthapādakukkuccābhāvena saññattabhāvo. Vossajja careyya tattha soti so tasmiṃ attabhāve ālayaṃ nikantiṃ vossajjitvā pahāya careyya. Paṭirūpaṃ hi tathāvidhassa tanti tādisassa taṃsaṇṭhitassa buddhamunino taṃ attabhāve nikantiṃ vossajjetvā caraṇaṃ nāma paṭirūpaṃ yuttaṃ anucchavikaṃ.

Carakāti sīhabyagghādikā sañcaraṇasattā. Bheravāti saviññāṇakāviññāṇakā bheravā. Tattha saviññāṇakā sīhabyagghādayo, aviññāṇakā rattibhāge khāṇuvammikādayo. Tepi hi tasmiṃ kāle yakkhā viya upaṭṭhahanti, rajjuvalliyādīni sappā viya upaṭṭhahanti. Tatthāti tesu bheravesu suññāgāragato buddhamuni lomahaṃsamattakaṃpi na karoti.