9. Paṭhamaāyusuttavaṇṇanā

[145] Navame appaṃ vā bhiyyoti bhiyyo jīvanto aparavassasataṃ jīvituṃ na sakkoti, paṇṇāsaṃ vā saṭṭhī vā vassāni jīvati. Ajjhabhāsīti samaṇo gotamo "manussānaṃ appamāyun"ti katheti, dīghabhāvamassa kathessāmīti paccanīkasātatāya abhibhavitvā abhāsi.

Na naṃ hīḷeti taṃ āyuṃ "appakaṃ idan"ti na hīḷeyya. Khīramattovāti yathā daharo kumāro uttānaseyyako khīraṃ pivitvā dukūlacumbitake nipanno asaññī viya niddāyati, kassaci āyuṃ appaṃ vā dīghaṃ vāti na cinteti, evaṃ sappuriso. Careyyādittasīsovāti āyuṃ parittanti ñatvā pajjalitasīso viya careyya. Navamaṃ.